Ang salamin sa mata na hawak-hawak ni Lian na nakalahad sa harapan ni Luis ay ang sentro ng atensyon ng dalawang estudyanteng magkaibigan pati na rin ni Jazz na tagapagmasid lang mula sa itaas. Si Jazz naman na kanina ay tahimik lang sa isang sulok ay bigla na lamang ngumisi sa kanyang nakikita at nahuhulaan na niya ang susunod na gagawin ni Lian kahit pa wala pa naman itong pinapakitang motibo.
“Paano naging solusyon sa problema natin ang isang pirasong salamin na nakalaan lang naman upang makapagpalinaw ng mga mata ng kahit na sinong Mirage?” Niliko ni Luis sa kabilang banda ang ulo niya nang maguluhan sa gustong iparating ni Lian.
Nagkibit-balikat si Lian bilang tugon tsaka niya itinapat ang salamin sa kanyang mga mata. Ordinaryo nga lang naman ito at lumilinaw ang paningin niya sa tu
