“Hindi ho ba kami mahuhulog nito, Kuya?” nag-aalalang tanong ni Faith. Napailing ako saka itinali ang blindfold niya.
“Hindi, basta humawak ka lang nang maayos sa lubid,” wika ko.
Alas-sais na ng umaga, kailangan na naming ipagpatuloy ang aming paglalakbay papunta sa Cerda. Ang dahilan kung ba’t kailangan namin takpan ngayon ang mga mata nina Faith at Arima ay dahil nagkalat sa baba ang dugo at lamang loob ng mga tao na nasawi sa trahedya kagabi.
Hindi ako makakapayag na maging bangungot kina Faith ang kung anumang matutunghayan nila sa baba. Kaya bago namin sila ginising ni Grae, nauna na muna kaming bumaba para ligpitin ang aming mga gamit. Dinala na rin namin ang mga bag pupunta sa puno na palatandaan namin kahapon. Masakit pa ang katawan ko pero hindi ko na ito masyadong binigyang p
