“SI TITO Jaco, Mama.”
Agad na napatingin si Agatha sa direksiyong itinuro ni Xena nang marinig ang pangalang sinambit nito. Nasa labas ng gate ng eskuwelahan si Jaco. Kaagad silang nginitian ng binata at kinawayan. Pumitlag ang kanyang puso at sandaling hindi nakagalaw. Aminado siya na bahagya siyang nadismaya nang walang lumitaw at bumuntot na Jaco kaninang umaga. Hindi niya alam kung ano ang nangyari. Naisip pa nga niya na baka naduwag na naman ito at bigla na lang umalis, bigla na namang iniwan ang anak. Buong maghapon siyang wala sa mood. Maging ang mga munti niyang estudyante ay napansin iyon.
Niyuko niya ang anak. Nakangiti si Xena ngunit hindi naman nagmamadali sa paglapit sa ama. Nararamdaman niya ang katuwaan nito na makitang muli si Jaco.
Lumapit sa kanila si Jaco. “Hi,” nakan
