BEHIND HIS INNOCENT LOOK

Naglalakad si Juliana sa gitna nang dilim papauwi sa mansyon ng kanyang Amo na si Congressman Raul bitbit ang kanyang biniling tinapay. Hindi niya mawari kung bakit mayroon siyang kakaibang pakiramdam habang papalapit sa mansyon. Nang makarating siya sa tapat nito ay laking gulat niya sapagkat walang guard ang nagbabantay sa gate. Napansin din niya na nakabukas ang lahat ilaw sa loob ng mansyon gayung matipid ang amo nila sa kuryente. Naglakad siya papasok at pagbukas niya sa malaking pinto ay bumulantang sa kanya ang guards, maids, mga anak at asawa ni Congressman Raul. Lahat sila ay nagtamo ng matinding pinsala sa katawan dulot ng tama nang bala na agad nilang ikinamatay. Agad tinawagan ni Juliana ang amo niya ngunit hindi ito sumasagot. May narinig siyang putok ng baril galing sa kwarto ni Raul. Naalala niya na mayroong sikretong daanan mula kusina paakyat sa kwarto nito. Dahan-dahan niyang iniyayapak ang kanyang mga paa papunta sa kwarto ni Raul sapagkat anu mang tunog na kanyang gawin ay magiging mitsa ng kanyang kapahamakan. Habang papalapit siya sa kwarto ni Raul, lalong lumalakas ang kabog ng kanyang dibdib. Para siyang kinakapos nang hininga pero pilit niya paring tinatatagan ang kanyang kalooban hanggang sa makarating siya sa gilid ng kwarto ni Raul. Sumilip sa maliit na butas ng bintana at nakita niya ang karumaldumal na sinapit ng kanyang amo. Puno ng dugo ang sahig kung saan ito nakahandusay. Nakita rin ni Juliana ang lalaking di umano'y isa sa mga magnanakaw. Nakasuot ito ng maitim na maskara at mayroon itong tattoo na agila sa kanyang kaliwang balikat. Kinuha ni Juliana ang kanyang cellphone at kinuhaan ng litrato ang lalaki sa maliit na butas. Mabuti na lamang at nakuhaan niya ito nang maayos. Tumawag si Juliana sa mga pulis at agad naman silang rumesponde sa kanyang sumbong. Nang marinig ng mga magnanakaw ang wang-wang ng pulis ay dali-dali silang lumabas. Agad nagpunta si Juliana sa maid's room para hakutin ang kanyang mga gamit. Dahil sa takot niya ay hindi ito tumestigo sa pangyayari at nagpasyang magtago sa probinsya niya sa Batangas upang tumira sa kanyang lola Lily at makapagsimula nang panibagong buhay. Gusto niyang malimutan ang masalimuot na pangyayari at maging masaya sa piling ni lola.