المغرور والمشعلالتي

الفصل الرابع

الفصل الرابع المغرور و المشعلالتي

تاني يوم صحيت ميرنا الساعه ٧ الصبح و كان احمد لسه مجاش و راضيه مامتها كانت نايمه و فضلت تتصل ب أحمد كتير بس مكنش بيرد و كانت متعصبه جدا افتكرت انه مش جاي و بعدها بشويه تليفونها رن و كان احمد

ميرنا . ايوه يا احمد ايه يا ابني اتأخرت ليه افتكرتك قليت معايا و مش جاي

احمد . و الله كان نفسي يا ميرنا بس معرفتش قولت اعمل ب اصلي معاكي

ميرنا . شكرا يا احمد ربنا يخليك يا رب

أحمد . عموما يا ستي انا في الطريق استأذنت ساعه و مش هينفع اتاخر عن كده عشان حسام معرفش جاي النهارده و متعصب و غضبان و مش ناقص ارفه

ميرنا . لا متقلقش مش هتتأخر ان شاء الله

أحمد . طيب قولي لي عايزه تهببي ايه تاني

ميرنا . بص جت في دماغي فكره جامده هتخلي

امجد يولع نار كده

أحمد . اخلصي يا ميرنا عايزه تعملي ايه

ميرنا . بصراحه يا احمد انا عايزه أتصور معاك فيديو تيك توك علي الترند الجديد و ننزله علي الفيس

أحمد . والله العظيم انتي مجنونه و خلي بالك التصرفات ديه هتخسرك كتير يعني لو انتي معجبه ب امجد بعد التصرفات ديه هيحس انك بنت مستهتره و علي استعداد تعملي اي حاجه حتي لو بغرض انك تكيديه و ده مش في صالحك ابدا يا ميرنا انا اول مره اشوفك متهوره كده

ميرنا . صح عندك حق انا مش عارفه مالي بس طيب قولي اعمل ايه يا احمد اصله شايف نفسه عليا و متقدم لي و ماما مخبيه عليا عشان كرامته مش سمحاله يعترف بحبه و انا الموضوع ده حارق دمي جدا

أحمد . يعني انتي معجبه بيه و عايزه الموضوع يجي من ناحيته صح كده

ميرنا . مش عارفه الصراحه

أحمد . الموضوع علي فكره مش مستاهل كل ده طالما جالك البيت يبقي بيحبك و عايز يتجوزك لو شاف منك ريق حلو هيفتح بقه و يتكلم و نخلص من المسرحيه ديه بس طول ما انتي شغاله تسوحيه هيعند اكتر . عموما انا خلاص وصلت انزلي نتكلم

ميرنا . اوكيه انا نازله

( فتحت ميرنا باب الشقه و كان امجد هو كمان لسه خارج )

امجد . صباح الخير يا ميرنا

( و لأول مره يمد ايده عشان يسلم عليها الصبح . استغربت و مدت ايدها عشان تسلم عليه )

ميرنا . صباح النور يا بشمهندس امجد

( فضل قلبها بيدق بسرعه جدا و امجد باصص في عينها و ماسك ايدها و بعدها بصت له بغضب و شدت ايدها و ركبت الاسانسير لوحدها و رزعت الباب و نزلت كان احمد واقف تحت بالعربيه ركبت معاه و كانت مدايقه )

اما امجد فضل واقف دقايق فوق بيحاول يستوعب هي عملت كده ليه و بعدها نزل في الأسانسير و راح الشغل

أحمد . ايه يا بنتي مالك عامله كده ليه علي الصبح فيه حاجه حصلت

ميرنا . انا مخنوقه اوي يا احمد امجد بيشدني ليه بطريقه غريبه اوي حاسه انه عامل خطه كده عشان انا اللي اتعلق بيه و اروح اعترف له بس لا يمكن ابدا اعمل كده

أحمد . انا مش فاهم يا بنتي انتي بتعملي خطط و هو بيعمل خطط انتوا مش هترتاحوا غير لما تخسروا بعض حقيقي انتم الاتنين متخلفين

ميرنا . لا يا احمد انا لا يمكن اروح لواحد اقوله اني بحبه حتي لو متأكده انه بيحبني مش ه**ر نفسي عشان مخلوق . و بعدين الطبيعي الراجل اللي يروح للبنت مش الع** و لا ايه؟

أحمد . طيب ايه رايك تعزميه علي الغداء بره . بس بلاش تعزميه بالتليفون اعملي حركه رومانسيه كده و روحي له الشركه و ادخلي علي انك عميله و اعزميه و امشي . هتعجبه الحركه ديه و يجري عليكي يعترف لك بكل حاجه ? ?

ميرنا . لا يا احمد هت**ف اوي مقدرش اعمل كده

أحمد . اسمعي مني يا بنتي الحركه ديه هتعجبه اوي و تجيب معاه

ميرنا . آخر مره سمعت الكلمه ديه كانت من ماما علي طبق بصاره و الصراحه مجبتش الحركه ديه غير الاحراج ليا ??

أحمد . انتي مجنونه ده لو بيحبك بعد موضوع البصاره هيقفل منك خالص انتي فين دماغك يا بنتي ?

ميرنا . يا بنتي مودتش حاجه ما علينا، طيب وصلني اي كافيه وروح شغلك و انا هقلبها في دماغي كده و اشوف ممكن اعمل ايه

أحمد . ماشي يا ستي يلا بينا اوصلك

( ركبت ميرنا العربيه مع احمد و وصلها لغايه أول الشارع و راحت ميرنا قعدت في كافيه و عماله تفكر يا تري تقدر تروح لأمجد الشغل تعزمه و لا مش هتقدر و كرامتها مش هتسمح لها تعمل كده و في الاخر قررت تروح )

راحت ميرنا الشغل و طلعت ل أمجد و أول ما شافها صاحبه المهندس محمود افتكرها علي طول و عينه لمعت كده بنظره اعجاب و راح لها علي طول

المهندس محمود . اهلا و سهلا يا انسه حضرتك بتدوري علي حد

ميرنا . اهلا بيك . ايوه بدور علي المهندس امجد

مهندس محمود . اممم المهندس أمجد في المكتب اللي هناك بس معاه عميله من شركه مهمه و بقاله بتاع نص ساعه بس متوقعش يخلص دلوقتي اصل امجد اي واحده حلوه بتيجي اعرفي انها مش بتطلع قبل ساعتين

ميرنا . ليه ان شاء الله بيحضروا الغدا مع بعض

المهندس محمود . والله انا بقولك عشان متستنيش و تتاخري اصل امجد مزاجه عالي اوي و علاقاته النسائيه كتير

( ميرنا نزل الكلام عليها زي الصاعقه و فعلا لقت المكتب بيتفتح و طالع منه واحده زي القمر و امجد بيسلم عليها و يضحك و فضلت ميرنا تبص بغضب و ضيق و هنا قررت ميرنا انها تمشي من قبل ما يشوفها )

المهندس محمود . يا انسه يا انسه استني اهو خلص اهوه ?

( مشيت ميرنا و مردتش عليه اما المهندس محمود قرر انه ميحكيش حاجه ل امجد و رجع علي مكتبه )

المهندس محمود . حته كنافه بالمانجه جامده علي الاخر يلا رزقك يا عم امجد

فضلت ميرنا تمشي في الشارع و هي مدايقه

و بتكلم نفسها

( هو انا مدايقه كده ليه ما هو طبيعي يكون عنده عملاء ستات و طبيعي يضحك في وشهم و بعدين هو انا يعني شوفتهم في وضع وحش ايه الغباء ده و بعدين عادي يعني يا بنتي انتم مش اتنين مرتبطين عشان تغيري عليه أو تدايقي و بعدين هو ممكن يكون بيتعامل عادي بس لا انا الراجل اللي شخصيته كده مش بتعجبني مش لازم يكون لطيف مع كل الستات حتي لو ده شغل . انا كان مالي و مال وجع القلب و الدماغ ده الله يسامحك يا راضيه )

و هي ماشيه بتكلم نفسها عدي عربيه كان فيها واحد شكله مش مظبوط وفضل يعا** فيها

( الغزال ماشي لوحده ليه ما تيجي نشرب القهوه مع بعض و نتعرف يا جميل )

و كانت ميرنا ماشيه مدايقه و خايفه و ع**ت اتجاهها ناحيه الشركه و فضلت تمد جامد لغايه ما قربت توصل عند الشركه و كان الراجل لف بالعربيه و رجع لها تاني وقف بالعربيه و نزل لها و مسكها من ايدها و شدها كان بيحاول يدخلها جوه العربيه فضلت تصوت و تضربه جامد و ثواني امجد كان ادامها و نزل ضرب فيه و قبل ما الأمن يوصل له ركب عربيته و جري بسرعه و محدش قدر ياخد رقم العربيه

امجد .ميرنا انتي كويسه ايه اللي جابك هنا حصل لك حاجه ردي عليا يا ميرنا حصل لك حاجه

(فضلت ميرنا تبص له و كانت واقفه متنحه ثواني و اغمي عليها شالها امجد بسرعه و لحقها من قبل ما تقع في الشارع و ركبها العربيه عشان يوديها المستشفي و فاقت ميرنا و هي في العربيه في طريقهم للمستشفي و كان امجد بيتكلم مع صاحبه و مخدش باله انها فاقت )

امجد . ايوه يا عم محمود ايوه معرفش ايه اللي جابها الشركه انا رايح بيها لمستشفى السلام و لما اوصل و اطمن عليها هرجع تاني )

ميرنا . استغلت الموقف و بعتت لاحمد انها تعبانه و امجد هيوديها مستشفي السلام و عايزاه يروح لها و فعلا قبل ما يوصل امجد كان وصل قبله احمد اللي كان قريب جدا من المستشفي

( بعد عشر دقايق وصل امجد و هو بيسند ميرنا اللي عامله نفسها مغمي عليها و أول ما شاف احمد اتصدم )

أحمد . ميمو يا روحي ايه اللي حصل لها فيه ايه عن اذنك و خد منه ميرنا و شالها علي ايده و جري بيها علي الدكتور

امجد . كان هيموت من غيرته عليها خصوصا لما شالها احمد وراح وراه للدكتور

( طلع الدكتور أحمد و امجد و بدأ يكشف عليها و طلب اشعه و تحاليل )

دخل احمد قعد جمبها و فضل ماسك ايدها و لما شافه امجد كده مقدرش يمسك نفسه وطلع بره المستشفي و لما اتاكدت ميرنا انه مشي بدأت تزعق في احمد

ميرنا . انت اتجننت يا احمد ازاي تفضل ماسك ايدي كده و ازاي تشلني

( احمد اللي بدا يتحرك جواه مشاعر ل ميرنا و هي متعرفش بدا يحس بالاعجاب بيها خصوصا انه بقي بيقضي وقت كتير اوي معاها )

أحمد . انا بعمل اللي اتطلب مني يا ميرنا انتي اللي طلبتي مني اكون مشعللاتي عشان اخلي باشمهندس امجد يغير عليكي و عموما انا اسف يا ستي انا ماشي دلوقتي

ميرنا . استني يا احمد بس عندك حق انا اللي اسفه كتر خيرك انك متمرمط معايا

أحمد . لا يا ستي عادي انا مبسوط وانا جمبك

( ميرنا استغربت الجمله جدا بس موقفتش عندها شويه و دخل امجد )

امجد . حمد لله على السلامة يا ميرنا عامله ايه دلوقتي

ميرنا .الله يسلمك يا امجد انا بقيت كويسه الحمد لله

امجد . تصدقي اني بدأت اصدق في تلاقي الأرواح اللي بينكم ده سبقك قبل ما توصلي المستشفي

أحمد . عادي يا باشمهندس الواحد لما بيحب حد بيلاقي روحه بتجري وراه في كل مكان بيروحه

ميرنا كانت بتبص لأحمد و مستغربه جدا

ميرنا . معلش يا احمد كنت عايزه اتكلم مع امجد خمس دقايق لوحدنا

احمد . ماشي يا حبيبتي انا واقف بره

( استغرب امجد انها طلعت احمد بره عشانه بس فرح جدا جدا )

ميرنا . انا كنت جيالك النهارده عشان اعزمك علي الغدا بس كان عندك عملاء مهمين و مقدرتش اقابلك عشان كده مشيت و قولت ارجع تاني يمكن تكون خلصت والباقي انت عارفه

امجد . طيب ما اتصلتيش بيا ليه ديه أول مره تيجي الشركه

ميرنا . اصلي عاملتك الصبح وحش بدون سبب وقولت لازم اروح لك بنفسي كاعتذار يعني

( بدون مقدمات قرب منها امجد و مسك ايديها و فضل يبص لها و بدأ يحس بضربات قلبها قرب منها و باسها بوسه طويله جدا مكنش حاسس بنفسه و هي كانت في عالم تاني واللي خلاه مكمل لما لقاها حطت ايدها علي وشه مكنوش حاسين بنفسهم و احمد كان واقف بره مدايق فتح الباب بالراحه لقاهم بيبوسوا بعض اتجنن و خد بعضه و مشي و فضل يكلم نفسه

احمد . انا مش مشعلالتي يا ميرنا . انا اللي النار والعه فيا بس انا هوريك يا امجد انا هوريكي يا ميرنا انتي اللي عملتي فيا كده

( استنوني الجزء الجديد عشان تعرفوا احمد بيخطط ل ايه )