“MATAPOS lang ang ilang araw ay namatay nga ang aming ina sa dahilang hindi namin alam. Hindi na siya nagising nang matulog siya isang gabi. Sa pagkakataon na iyon ay mas naging malupit sa akin si Divina hanggang sa lumayas na siya at ang balita ko ay nakapag-asawa siya sa Baryo Sapian. Hindi ko naman alam na hanggang ngayon ay hindi pa rin siya nagbabago…” Malungkot na pagtatapos ni Aling Ipang sa kwento nito.
Napaatras si Danilo matapos ang pagkukwento ni Ipang. Dama niya sa puso niya na hindi ito nagsisinungaling at katotohanan ang lahat ng sinabi nito. “K-kung ganoon, si Aling Divina ang may-ari ng kuwintas ng itim na mangkukulam at hindi ikaw?” Naguguluhan niyang tanong.
“Oo. Tama. May alam din ako sa pangkukulam ngunit hindi ko iyon ginagamit. Mas bihasa si Divina sa bagay na iyon
