قلوب تائهة

الحكاية الاولى ج٦

شايفين الواحد بس يصير اناني ويحب نفسة كل الحياة تبتسملة لحظة ما توگفين تفكيرج اتجاه نفسج وبس رح تلگين الدنيا كلها تهتملج وتخاف منج رح تلگين ناس تحبج ومعجبة بيج هيج فجأة تجمع الأشياء الحلوة وتكبر داخلج اني وبس..

جالسة وحدي في عتمة الليل الموحش ربما لم تعد جروحي توذيني ولكن الالم الوحدة ياترى ماذا يحدث غدا..

رجع رقم غريب دگلي..

رفضته ..

رجع دگ..وهم رفضتة..

مرة ثالثة ورابعة خليتة صامت..يمكن عجبني اكو شخص يظل يرن وماارد اله

يمكن ارد اعتباري شوي..

بعدين اجتي رسالة..

كل ماتشلعين گلبي احبج اكثر،اني اعرف عنج كل شي ..الحياة القدمتيهة للناس الحواليج وماقدروهة اتمنى يوم واحد اعيشة ..

سديت التلفون ..ومااعرف نبضات قلبي ليش زادت ..لزمت التلفون مسحت الرسائل..

رجع دزلي مسج..

جنت اعتقد وحدة بعطاءج وحبج تكون كبيرة والتجاعيد مالية وجهه..بس بعد ماشفتچ مااعرف شصار بية..سرمد شخص غ*ي لأن فرط بهيج جوهرة ..

كلش تعصبت وخفت ..اكو تفاصيل ذكرها بس اني وسرمد نعرفها معقولة الخسة مالتة وصلت يگول لاايمان ع تفاصيل حياتنا ..

لا ..الموضوع زاد عن حدة..اني اعلمك ياسرمد..مجنت اتخيل انت هيج منحط...

رجع دگ علية جاوبتة بعصبية..

الووو..

باوع ..گول للدازتك ..اني مو مثلج ياطايحة الحظ الي مخليتي واحد يعني عليج ونفگتي عالمطفي سرمد ..بس اني حدج والله بالعرف اتصرف وياج انتي وسرمد ..واذا مرديت اعتباري..مااكون اني زمن..

سديت التلفون..

دزلي مسج..

كلة ولا اعصابج ..تروحلج فدوة ايمان وسرمد وعشيرتهم لاتضوجين....

هم شنو ..تتعصبين منهم..

انتي غلطانة كبرتي رأسهم..

زاد الشك داخلي..اذا مو ايمان دازتة لعد منو..

لا ..هي اكيد ..ودتراوغ عمود مااعرف منو ..

هسة نشوف البنات هم يعرفون ..

دزيتلهم ..

مروة: گالت اني اوصلج الا بس الموضوع يحتاج وقت وإني حايرة بالطلب مالي..

عبير: احسن شي گولي زوجج ..هو يعرف يربيهة ..والله احسن الج..

مروة : الطلي لو بي خير جان من يوم عرف بمرتة وسوالفهة طلگها مو صاير سبع بس ع زمن..

عبير: مروة ..انتي لاتخليهة تنقهر من حجيج..

مروة: اني اريدها تنقهر عمود تعرف تتعامل ويا صح..هذولة ميفيد وساهم بس السا...

عبير: مروووة..

زمن:. عوفيهة عبير..كلام مروة صح..الظاهر اني غلطانة بالحياة والناس..

والدنيا كلها تمشي وإني بمكاني..

وإني كاعدة اكتب لصديقاتي..

اجتني مسج..

اكيد ضايجة وحدج ..مثل مضايج اني ..ياريت بس يجمعني وياج بيت وغرفة وسرير..

زمن: حطيت ايدي ع حلگي هذا شيحجي..عزة ..هذا شمدري اني وحدي..

خفت ..دگيت ع سارة وعلي كتلهم تعبانة تعالو نزلو يمي لان هم ماخذين الطابق الفوك بيتي..

معقولة تالي عمري هيج يصير ..

من الصبح بدلت وغسلت ورحت بوجهي لعمر ..وخلفت الا هسة نروح نقدم دعوة تفريق ..مو انتظرة يجي هو وإني كاعده وملعوب بية طوبة..

عمر: زمن ..شسامعة من الصبح..

زمن: عمر ..دا اگلك بعد مااتحمل طلگني من هالرجال ماأبقى ويا..

عمر: زمناية اهدي يمعودة وارتاحي..شصار عليج احتمال نتفاهم بلا محاكم ويطلگ هيج ..

زمن: اني اريد محكمة واريد اخلعة حتى مو تفريق..

چنت عصبية ومااعرف شأكول..

زينة: زمن شبيج ..يمعودة هسة يرتفع ضغطج..

زمن: خربية..خل يرتفع واموت واخلص من هالدنيا..

علي ..من شافتني عصبية لحگني لبيت عمر..

علي: زمن شبيج يمعودة..والله خوفتينا..

زمن: طبيت ع رجلي..معلية ..هسة اروح محكمة وترفعلي دعوى ماأبقى ويا ذاك الإنسان..النذل..

انتبهت ..لوجوه عمر وعلي..اخذت نفس لزمت الڤاترينا موجودة بالمدخل مال بيتهم..

اني اسفة ..ياولد ..بس خلص هذا حدي ..ويا اخوكم ..اني اسفة عمر.. اسفة علي..بس بعد مابية..والله مابية بعد..

نزلت راسي ونزلت دموعي غصبا عني..

دمدمت ويا روحي كلمات دا اطلع..

اجوي الولد سندوني..

عمر،علي: لاتهتمين ام حسين احنا وياج ..بس فهمينا شنو الصار صح ردتي تنفصلين بس شصار وخلاج هيج بهالوضع..

انحرجت شااگللهم ..وشااحجي عمر انتبه ..گال لزينة وسارة الي اجتي ويا علي ..يفوتون ويفتهمون القصة كلها..

فتنا للغرفة وحجيتلهم..

زينة: ايا ..نذل..الماعندة غيرة اني اعلمة..

زمن: لزمت ايدهة..زينة ماصدكت انتي وزوجك تصالحتو لاتخربين علاقتكم..

سارة:زمن ..انتي متأكدة انتي محاجي. وحدة من صديقاتج وهي ممكن كايلة لااحد..

باوعت ع سارة..

انتي من كل عقلج ..تعرفين اني هاي المواضيع كلش حساسة بالنسبة إلي ..انتو خواتي مااعرف أحجي وياكم هيج..

زينة: اني گايلتلج من زمان ..هذا ميستاهل..

خ يولي..هسة اگول لعمر ..وهو يتصرف واذا الرقم الي اتصل عليج من طرف ايمان يجيبو..

وخل يشوف سرمد النمايم الجايبهن..

زمن: كعدنا بيت زينة نتريگ وإني اصفن عاللكمة وبداخلي غصة...ومو مشتهية حط عمر ايدة ع ايدي..

ام حسين لاتنقهرين والله اذا عرفت سرمد الي الحاجي ومرتة دتسوي هيج...

والله اتبرى منة ..

هسة كملي وتروح لزينب ..نقدم دعوى اذا يريحج هيچ..

زينة: منو زينب؟

عمر: استلمي زمن احنا بيا حال وهي تسألني...يابة بنية مرة صديقي محامية..

زينة: هااااا...

عمر: ارتاحيتي..

زمن: يلا لعد عمر ..خلينا نروح رح اروح للبيت ابدل واجيك..

سارة : اني هم تأخرت ع الكلية مالتي..

علي: الله يديم النعمة..

زينة: كلكم هجو والمواعين منو يشيلهة ويغسلهة..

عمر: البركة بيج ام ليان ..شدي حيلج الله يساعد زمن يومية ريوك يمهة..

زينة: امري لله...اشيلهم ..سارة انتي يمج الغدا ترجعين من وكت..

سارة: علي ..لاتنسى حبيبي الغدة ذبو براسي..

زمن: هذا الحوار الممزوج بين الدعابة والرومانسية خلاني افرح انو مشكلتي مرح تأثر ع حياتهم ..وهذا كان أكبر مخاوفي أنو مشاكلي تأثر ع حياتهم..

رحنا للمحكمة وقدمنا الدعوة وطبعا زينب مقبلت ارفع دعوى خلع وكالتلي لازم اقدم تفريق اذا مقبل نحولها دعوى خلع..

المهم هم يدزون بلاغ لسرمد ..

كمل عشر ايام ..رجعة من الشمال ..وعلي راح لسرمد ومتلاغي ويا وجايب الجهال وكتيبة ع دعوة القدمناها..

وجاب الجهال..

وظليت اتواصل ويا البنات ومروة تمشي ورا الرقم اليراسلني ..عرفت انو عندة معرض سيارات ..وممرتبط ..أو أرمل وعندة ولدين ..عاد مروة من تريد شي لازم جيبة..

بقى بس اسمة عمود نعرف منو هو ..

اجة يوم المحكمة ..جنت كلش شايلة ع سرمد رغم هو باين علي التعب والجهال كالو راحو ويا ابوهم وايمان مجانا وياهم بس مااهتميت..

ردت بس اخلص من هالارتباط..وبس..

طبعا زينب طلبت من القاضي جلسة سرية ..عمود نقدم الحجي الصار..وللاسف اغلب الرسائل مسحتهم كان فادتني بالقضية..

شفت الصدمة بوجه سرمد كأنو ميعرف..

تأجلت الدعوى ..لحد مايجيب قوائم الهاتف من الشركة ..

بامر من المحكمة..عاد اني كتلة ماكو داعي فضائح طلگني وخلينا نخلص بس القاضي أجل الدعوة وطلعت انتظر الموعد الثاني..

مشيت دا اطلع..لحگني سرمد..

لزمتني من ايدي..

زمن..زمن..

ها ..خير سرمد..احنا البينا المحكمة ورجاءا بعد لاتحجي وياي ..ولا توصلني لحد مايطلع قرار المحكمة...

سرمد: حلوة ..هاي اني اعرف هاي حجج وشوفي منو دازة عمود يگول. حجيت وإني مو حاجي..

عصبني..

زمن: هسة يلا صدگت ..انت مرتك مسويتلك شي مشربتك ..

سرمد: هي مالهة علاقة لاتدخليهة..

زمن: باوع انت..باوع بنفسك هذا الرقم وهاي الرسائل عمود تعرف مو كذب..

باوع عالرقم..صفن لحظة طلع تلفونة وكال كلمتين..ايا نذل..

صعد بسيارتة ..وطلع ركض..

وإني مااهتميت اكيد عرف هذا الرقم لجماعة ايمان..

ركبت السيارة خابرت البنات ..مروة كالتلي عرفت اسمة..

مروة: ولج زمن اني من اول چنت شاكة بس هسة تأكدت ..

زمن: شنوووو..

مروة: الي يتصل عليج علاء..

زمن: منو علاء..

مروة : عرفتج مطفية ..ولج صديقة لسرمد..

زمن: عزا..يابنات ..سرمد عرف ..وهسة اكيد راح بوجهة لعلاءوهسة صير مصيبة .

عبير: ليش رجلج شدرى..

زمن: اني شوفتة ..عزا ..يابنات روحو بعدين اتواصل وياكم..

خابرت ع عمر وكتلة ..وراح بوجهة لمعرض علاء لگى عركة جبيرة صايرة ومخابرين الشرطة عليه..

........

سرمد: ظليت مذهول هذا الرقم مال صديقي ..لا شون هيج ..علاء..

شفت السيارة بسرعة ...وظلت الذكريات تدور بية..

هااا..سرمد شبيك..

مابية بس حياتي حيل تعبانة ومالها اي معنى..

علاء: هاك اشرب..

سرمد: لا ..مااشرب يمعود شيخلصني من الشرطي العندي..

علاء: هيج منكدة عليك وتخاف منها..

سرمد: اني مو اخاف منها اخاف عليها..

وهذا شيسمونة حب تملك..

جريت نفس بالجكارة..

تعرف علاء ..مرتي مداريتني وصاينتني وجامعة اخواني بس مرات احس خوفها وسوالها ..خوف ام على ابنها مرات احير شون احس بيها..ولايوم زعلت مني ..طبعا ورا مااجوي جهالنا وتوفت امي هي قائمة بينا مثل الساعة ..بس اني ضايج ومخنوك..

علاء: الله ربك..هيج مرة عندك ..وضايج..

ياب ..دشرب ..واطلب السماح من ماما..

سرمد: لاتلح..ولاتشاقى..

............

علاء: ها سرمد..شبيك مو على بعضك..

سرمد: سالفة قديمة..

علاء: كول شنهية يمكن اساعدك..

سرمد: أيمان..

علاء: منو هاي ايمان..

سرمد: بنية حبيتها من جنت بالجامعة ..واستقتلت عليها اقاربي هي..

بس الوالدة الله يرحمها مقبلت وظلت حسرة بگلبي بس مااريدة اظلم زمن..

علاء: بمكر ..وشكو بيها ..الشرع حللك اربعة..واكيد ع حجيك زمن رح تتفهم أو قضية وياها وقت ولاتظل بنفسك..

........

ظلت الذكريات تجمع وإني احس الشر راكبني..

كل الصار بية بسبب الحجي اليحجي براسي..هو خرب حياتي ..ودمر استقراري..

هو دلاني الحرام. ...

وخلاني اشرب..واستغل سكران وتحجيلة عن مرتي ..وجكد مشتاقله..

بس هين..هين جاييك اني...

زمن: خفت لاسرمد يسوي جريمة..

خابرت ع الرقم اليخابرني منا علاء ..

علاء..

الو ..عرفتي اسمي عرفت انتي ذكية..

مو وكتك علاء..سرمد عرف انت تراسلني ..وجايك اكيد..

علاء: خل يجي..حيا..

زمن: انت شنو ..اكلك جايكوالشر راكب راسة ..اطلع من مكانك لاتصير جريمة..

علاء: لاتخافين ..اني اعرف دبارة لزوجج..

انتي لاتهتمين زمن ترا اني عالحجي حبيتج..ومن شفتج ..تعلقت اكثر..

زمن: انت شنو متستحي متخاف..شهالحجي اني مرة متزوجة واللي جاي يهد عليك زوجي..وأبو جهالي..

علاء: قريبا رح تطلگين وإني اتقدملج..

زمن: انت مو صاحي اكيد..

سديت التلفون ورجعت خابرت عمر..

هو هم عايف البيدة وراكض ع سرمد يلحك بي..

بس مايندل المعرض بالضبط..اني ويا ندگ ع سرمد مايشيلة..

رجعت خابرت مروة ..دلتني ع المعرض..

رحت بوجهي علي أسأل ..ويدلوني..

فتت وجان سرمد واصل ..ولازمي الامن مال معرض وعلاء مدمى..

وسرمد يصيح ع علاء..ولك ناقص ..عينك ع مرتي..انت واحد نذل..

الة اوريك علامك..

وگفت متبسمرة بظهر سرمد ..وهو التفت من شاف علاء سكت وباوع علية..

زمن..بعصبية..انتي شجابج هنا وگف عمر بظهري ..

زمن..انتي..

كلها دقائق الكل صار بمركز الشرطة لا سرمد رفع دعوى ع علاء ولا علاءسوا دعوى علي مجرد سوء فهم وتطور..

طلعنا ..علاء ركب سيارتة وراح..

وسرمد هم ..ماحجة ولاكلمة..

وإني وعمر رجعنا للبيت وعلامات الاتهام باينة بعيون عمر وعلي..وحتى خواتي..

صرت مذنبة بدقيقة..

وعدت وحيدة..

اتصل بية علاء وهالمرة بدون اي حجي...

شوفي يابنت الناس اني شاريج..ومستعد اصوغج صوغ وحدة مثلج انام مرتاح ومأمن انتي بيتي وكل الضمانات الترديهة اقدمة ..

انتي بس تطلگين من سرمد ..وإني انتظر تخلص العدةواجي اتقدملج واسف خليتج بهالموقف ..مستعد اردلج اعتبارج..بس كولي اي..

سديت التلفون..واختليت بنفسي..يعني ليش اني الوحيدة الي حياتي مكاعد تستقيم ليش ساعة ماخفت ع سرمد ورگضت لايصير بي شي طلعت اني العندي علاقة بعلاء والسويتة افلام..

لفترة حسيت الكل ابتعد عني كأني مرض معدي..محرومة من اولادي ..زوجي ضاع مني..خواتي وازواجهم شايفيني زوجة خائنة مبقاليغير صديقاتي الي جمعني بيهم كم كلمة كتبتها عالفيس ..

رحت لبيت مروة مثل كل مرة عيون الناس تراقبني وعبير هم..

دكيت الباب..

طلعتلي مروة..

هلا..زمونة جيتي بوكتج..تعالي خوش شلةمتجمعين..

باوعت اكو ثلاث رياجيل ع اساس ازواج مروة وعبير بس شفت تصرفاتهم غريبة..

مو مال ازواج ..

عبير تأشرلي طلعي..

عاد صدك نظراتهم معجبتني ..

ترخصت من مروة وتحججت بموعد..

مااعرف كرهت نفسي..

ركضت برة الشقة دا اركب سيارتي ولحكتني عبير...

زمن..زمن..

هاا..عبير ترة والله مستعجلة عندي شغل..

عبير: لاتحلفين..زين حسيتي على روحج وطلعتي احسن ماتغوصين بالوحل..

زمن وكفت مستندة ع سيارتي ..

ليش..شنو..

عبير: تعالي نروح مكان الناس تتف*ج علينا..

زمن: ماااشي..

ركبنا وصلنا مطعم گعدنا ..شربت عبير مي ..وبدت تحجيلي عن حياتهم هي ومروة..

عبير:قبل اربع سنوات زوجي قرر بيوم وليلة يطلگني ويشمرني بالشارع..

علمود يزوج وحدة ويكعدهة بالگون المسكنليا توسلت بي بقيني اقبل يزوج كالي مكان ضيق..وميكفي وماعندة إمكانية يفتح بيت وهو كوة فاتح ايجار بالگوة..

رجعت بيت اهلي شوفوني المر خصوصا اخويا ..واخر شي شال ابني وشمرة ع ابو كالو منعيش جهال غيرنا..

يوم عن يوم گمت أكره حياتي ..

وضاقت عليا..لحد مايوم فتت لصالون وليتني مافتتله ..

زمن: ليش..

هناك تعرفت ع مروة ..وصرنا صديقات أشكيلها وتساعدني تنطيني هدومها ع كولة يتيمة ماعدهة خوات واعتبرتني اختها وانقهرت عليا..

كالتلي شكو متحملة تعالي اني عايشة اني وعمتي ..واشيلج فوك راسي..

ظليت افكر بالموضوع والمشاكل زادت لان مرة اخوية متريدني ..

لحد ملگيت روحي بالشارع توسلت بزوجي يرجعني وجان احقر من اخوية بعد..

خابرت مروة وهي استقبلتني..

وصرنا صديقات..دبرتلي شغل..وبعدين كالتلي لازم اهتم بروحي بعدني شابة وصغيرة ..

ومشيت بوصيتهة عرفتني ع واحد ..وشوية شوي صارت علاقة واتصال ووعد بزواج وانتهينا بشقة وهو مستكعدني بيها لحد مامل وشمرني وظليت على هالمنوال..

زمن: انتو شون تخدعوني طول هاي الفترة وإني..

عبير: اوگفي زمن ..قبل لاتحجين ماكو وحدة براسها عقل تكتب عالفيس ساعدوني زوجي خاني شتتوقعين اكو ناس رح تساعدج هيج مصلحين اجتماعين..

وانت مثقفة وفاهمة كل شي مبين مفهوم بس انتي مردتي تطلعين من دائرتنا بس احب اگلج..

حمدي ربج عندج ..بيت ووظيفة وسيارة ..وحمويج سانديج اكثر من إخوة..

وانتي ضعيفة وتعبانة لعد لو ضرووفج مثلي ومثل مروة جان شسويتي حمدي ربج وعيشي حياتج وهاي عمود اثبتلج انتي محظوظة خسرتي سرمد..وهذا علاء جايج من الباب..لاطالب علاقة ولارح يأذيج انتي محظوضة واللي مثلي يتمنى يكون بربع حظج..روحي عيشي حياتج بعيد عنة لاتعرفينا ولاتندلين طريقنا دامج بالسليم..

زمن: مااعرف حجي عبير صدمني..كلش كرهت نفسي كل هاي الفترة امثل ع روحي دور المخدوعة..لا جنت حاسة وساكتة..

بس رب العالم نجاني..

مااعرف ..شون وكفت سيارتي كدام بيت سرمد..

دگيت عالباب..طلعتلي ايمان..

ايمان: هاي ..انتي ..شجابج..

زمن: اريد سرمد..بلا زحمة عليج صيحي..

ايمان: سرمد ..نايم ..مااكدر اصحي..

زمن: يگعد..اريدة..

ايمان: انتي شون تجين تتهجمين ع بيتي وتريدين رجلي .

زمن: شو وخري ..سكتتلج هواي ..البيت الكاعد تحجين علي بيت حماية..

والرجال الگلتي اخذة هو زوجي انتي البگتي مني..

علا صوتنا..وطلع سرمد..

هااا..خير ..

زمن شجابج..

سيارتي هي الجابتني...اريد أحجي وياك..

سرمد: فوتي جوا مو تفضحونا بالباب..

ايمان: سرممممد..

سرمد: ايمان ..فوتي جوة..

تفضلي شتريدين تحجين انتي..

زمن: اني جاي اگلك كلمتين..

سرمد : شنو هي..

زمن: لا هو حجي هواي مخزن بگلبي من ساعة متزوجتك...

اي ..لازم تسمعة..جنت خائفة بيني وبين نفسي أحجي ..كل لمسة تلمسنياها جنت احس روحي غير إنسانة كانو تتخيل . .

المهم..كرهت روحي وإني اكتشف حبك آلهة ..وإني ماكو اي احساس .. تحملت اهمالك..وتعصيبك ..شلتك بعيوني..كلت بلكي تنسى بلكي تحبني..

واكتشفت ..اني لاشيئ..

اي ..مالي اي تأثير ولاشعور..

حالي حال اي قطعة أثاث..

لا العفو الخدامة القائمة بكل شي..

خليتني أكره روحي واستصغرهة ..

مليت من نفسي..ولك ردت اضيع بسببك..

بسبب هجرانك الي..

وكعدت تفصل وتحجي كدام صديقك..ماگلت هذا اذا شافني شون يتخيلني ..انت **رتني ..**رتني وحسستني اني رخيصة وفترة بحياتك تفرغ بيها رغبة..

ااااه..هسة كملت كل الحجي الاريد اگولة الك ..وخلص احلف لنفسي بعد مااذلهة ولااذيهة ومثل ما عيشتني كنزوة وهي حقيقة اني هم رح انساك واعيش حياتي..اسفة تهجمت ع بيتكم وضوجت زوجتك..مع السلامة..

سرمد: زممممن..

التفتت..

انتي عمرج مجنت نزوة ..انتي الحقيقة الوحيدة بحياتي ورح اعيش عمري كلة ندمان لان فرطت بيج حبيبتي..

للقصة بقية..

تحياتي..

نازك الملائكه

تكونون عرفتو العبر بالقصة ..احنا نظل نكتم مشاعر داخلنا ومنطلقها الا لمن يكون الاوان فات والحياة عدت وخسرنا كل شي ..

ترقبوا النهاية وشون رح ترسى حياتهم هم الاثنين..

لاتنسوني من فضل تعليقاتكم عالقصة فضلا وليس أمرا

دمتم بأمان الله وحفظه