قلوب تائهة

الحكاية الاولى ج٥

مااتخيلنا راح ناخذهة ،صح لفترات متفاوتة بحياتي ردت انفصل عن سرمد ويمكن فترات بس ردت احسسة بوجودي لكن بعد مازوجو خواتي وجبت اولادي ووالدي توفى خلص شلت هالقرار وتعايشت ويا حياتي بس وإني احاول اتعايش ويا الوضع نسيت اعيش ،اي نسيت افرح نسيت اهتم بروحي نسيت احبهة احنا دائما نلوم شركاؤنا انو ليش يتركونا ليش ماحبونا ولگيت الجواب لروحي لاني ماحبيتي روحي مافرحتها مااتعاملت باانانية البشر...

الأمر أشبه بالملح ..الملح يكولون علي سم ابيض بس بدونة الاكل يصير بدون طعم ،الانانية هم مثل هيج لازم تكون النا مساحة لروحنا ونفكر بيها ونخلي حدود للناس الحوالينة..

بعد مراح سرمد ..بقو الولد فترة وإني ماطالبت برجعتهم لازم يتحملون شوي ..

بعد مارجعت سارة من السفر اجتمعنا جمعتنا المعتادة والولد حبو يسوون مبادرة للصلح ..عزمو سرمد واللي فرحني بالموضوع جهالي الغابو عني..

تناسيت موقفي ويا سرمد واخذتهم بحضني .

زمن: هلو ماما شونكم ..شون صحتكم ...

حسين: زينين ماما... بس مكانة ضيق احنا شوكت نرجع لبيتنا..

زمن: أن شاء الله عن قريب ..

هلو علاوي حبيبي شونك..

علي: زين..زين ..

هذا الولد دومة فاقد المشاعر حتى مااحس فرحان زعلان يحب أحد فاصل مثل ابو ..

سرمد: السلام عليكم ..

زمن: وعليكم السلام والرحمة ..

اني اجيت ..الولد عزموني..

زمن: هلا بيك طبعا البيت بيتهم واذا رادو يعزمون اخوهم اني مالي علاقة..

سرمد: اذا مو حابة گعدتي ..اطلع..

زمن: لاابد ..اهلا بيك تبقى ابو جهالي..

سرمد: بس...

زمن: هذا كافي ابو حسين حياك من رخصتك نصب ..

زمن: كل قوة العالم جمعتها بذاك اليوم حتى محسيت بااي مشاعر كل الداخلي صور لجروح متسلسلةاخرها زواجة وهجره الي..

طبعا بفضل دعم البنات ..الي..صح ميعجبني حجيهم ولا تصرفاتهم بس هم طلعوني من هالوضع وطبعا هم نفذو لعبتهم ع سرمد..

بس سرمد ..ماانطى مجال لااي وحدة..

كمت احسدهة لاايمان لان وفي بحبة آلهة ..وميقبل ي**نهة..

فتت للمطبخ ..حطيت تلفوني عالكاونتر ويا خواتي دنحضر الغدا..

وزينة گبت من عرفت سرمد وسمعت صوتهة يلعلع ويا عمر..وهو بدأ ينزعج اجيت اريد افتهم..

زمن: زينة..عمر ..ها خيركم يمعودين..

زينة: انتي شون تقبلين يجي هنا بعد السوا حتى جهالج اخذهم منج انتي ماعندج كرامة..هذا النذل يسوي هيج .

بساعتها ولااول مرة عمر ضرب زينة ..وصار عصبي وچان ناوي يأخذ سرمد ويطلعون ..

زينة ثارت..تضربني عمر ..تضربني اني صوجي باقية يمك جان طلگتك من زمان .

عمر : خوش ماشي الي تريدي يجرالج .

ظلو يتعاركون بينهم..وإني احاول اهدي..

اخر شي صحت بيهم هم الاثنين دفعتهم بغرفة الجهال..وسديت الباب..

زمن: كااافي..كافي..اني كم مرة اگللكم كبرو عقلو لخاطر جهالكم انسو جهالكم لخاطر العشرة ..

عمر: زمن ..اني صدك تعبت يعني زينة خلتني أكره الدنيا كلها اي احد بالعشيرة تشمرة علية ..

زينة: اني اشمر عليك لو انت..يومية لايف ع وحدة هاي عدهة قضية وهاي استشارة قانونية ومخابرات تالي الليل..

اني تعبت من مراهقتك المتناهية واكول خواتي مااسوي شي يضرهم..واسكت وتتوسل وترجع تعبت ..

زمن: كنت مصدومة تعبانة كل ظني خواتي بلا احساس ماعدهم مشاكل ..

طلع هم هم عدهم مشاكل وميحجون..

ظليت اسمع وصافنة..

زينة: ذاك اليوم ..مو انت كتلة لعلي لا تظل مطفي امشي اخذك اشرب ..صير رجال...

حطيت ايدي ع حلگي..

عمر: حجي ..حجي جيتج يوم اطوطح..

زينة : مو حجي ..مسويهة والله اعلم شكو بعد

عمر: زينة اسكتي..

زينة : خايف من سرمد ليش هو احسن منك باوع شون باع عائلتة ..

مو هاي ايمان الي جانت تشكيلك من زوجها..

زمن: رجعت شهگت شهالحجي ..

لا ..ياربي..

عمر : انتي شكاعدة تخربطين هي رادت تطلك من زوجها وإني ساعدتها ..

وهي موكلتي اكيد تحجيلي تفاصيل تهم القضية..

زينة: تهم القضية زوجها مينام يمهة وعندة علاقات غيرها..وهي مسكينة معوزة حنان..وانت مصدگت..

عمر: اش..اش كافي..سرمد هنا..

زمن: كمت ع حيلي تقربت لعمر ..ضربتة راجدي ..

جرامات الربى بيك لك هذا اخوك شون تطخ شرفة هيج..

عمر: زمن..قبل لايزوج..قبل لايزوج والله ..

هي جانت تدور رجال والسلام سرمد غيرة المهم رجال افتهمي ياغ*ية وجه كلامة لزينة..

وكما كلامة..

والله وداعتج زمن انتي تعرفيني والله وكلام الله وبروح امي وابوية مطاخهة ومااعرف سرمد يريدها حجيت عليها هو صار وعبالة هي الشريفة الطاهرة ميعرف هي لاعبة عالحبال كلهة وسرمد

هو الوگع شمدريني..

زمن: مااعرف ..شون اندفرت الباب..وفات سرمد مثل الثور الهائج ايا غيرة سيز تغازل بمرتي من ورايا ولك انت واحد متستحي حتى مرة اخوك تطعن بيهة هي هاي اخرتهة..

لزم عمر من ياختة وكعد يضرب بي..

علي: سرمد ..عوفة سرمد ..انت شنو ..ذيج اخذت عقلك باوع لروحك ولعائلتك ضيعتهم وهسة اخوك..اصحى..اصحى كافي..

زمن: هذا الكم الهائل من الصدمات اني مو گده ماحسيت ع روحي شون خربت ..

ياربي شهالكابوس الميخلص اطفالي زوجي عائلتي كلهة انهارت بغلطة..غلطة ارتكبها شخص ،لسة ايد لازمة عمر وايد لازمة سرمد..

ماحسيت شون الهدر تسلل لااوصالي باوعت ع سرمد وبعيني دمعة ..

تركت أيديهم ووكعت..

زينة: زمن..زمن...

زمن: بلحظة تكون حياتك محصورة بغرفة وسدية جكد جنت تعبانة ومرهقة بس مجنت اتعب ولااتمرض بس ان*د حيلي..

مااعرف بس اتخيلت الموقف الي هدنا كلنا ..واگف سرمد بجهة واولادي يبجون ..

وعمر قميصة مشكوك واكو اثار ضرب ع وجهة رغم عمر كلش طويل بالنسبة لسرمد ..

وعلي حاضن سارة ويحاول يخفف عنها..

هيج بلحظة هذا الدفو والهدوء اختفى من بيتي هل كانت غلطتي كان لازم اگول لخواتي مصيرنا رح يربط بعض اذا كانت أول حلقة متخلخلة شون اورطهم...لا اني سكوتي ..هو الوصلني لهالمرحلة عمري أربعين عندي ضغط وصابتني جلطةخفيفة..

مااعرف شنو احساسي بس بچيت بجيت بحرگة ع شبابي وع حياتي الضيعتهة وإني اخاف ..من كل شي الناس وابوية وجهالي ..

وهسة الوحيدة الي تأذت هي اني..

صحيت ع صوت الطبيب..

ها ست زمن شونج..عائلة بكاملهة واگفة وخائفة عليج .

تحسين برجليج .

زمن: اي دكتور ..

طيب انطيني ايدج تكدرين تحركيهة..

زمن: احس بخدر باايدي وراسي ثقيل

دكتور : هذا بفعل العلاج بس منا وهيج لازم تدارين صحتج وتبطلين تعيطين محد يفيدج..

زمن: حاضر دكتور ...

لشوي طلع الدكتور طمنهم ع وضعي..

فاتو خواتي وجهالي ..وحمويني..رغم عمر شايل ع زينة وضايج من موقفها بس حس بخوف علية ..

عمر: ها ام حسين سلامتج..

زمن: بصوت متعب.. الله يسلمك عمر..

اجتي زينة وهي تبجي وتتاسف..اسفة اسفة زمونة كلة من ورايا ...

زمن: سكتي ..كافي ام ليان لاتبجين..

سارة: زمونة ..شحاسة تعبانة بيج شي..

علي: شهالسوال سارة مسمعتي الدكتور كال جلطة..

دغة عمر..عمود لاانقهر..

عمر: دومك تجفص بالحجي..

زمن: الدكتور مالي لاتحجي ع علي..

علي: سلامتج خيتي..

الله يسلمك علاوي..

جهالي وين ..

علي حسين..وردة: هياتنا ماما..

باوعت عالباب..ماكو سرمد..

راسا انتبه علي..

علي: ترة سرمد بقى ولمن اطمن عليج راح للبيت مااعرف صايرة ويا شغلة..

زمن: ماااشي..

شوكت تطلعوني من المستشفى حيل ضجت..

عمر : الدكتور كال يومين يراقبون حالتج لاتستعجلين ..ارتاحي اول..

زمن: اووف يومين شيخلصهن..

سارة: لاتشيلين هم الجهال يمي اني وعلي دايرين بالنا عليهم..

زمن: ماااشي..اوف يابة راسي شكبرة صاير..

زينة: سلامتج..اني رح ابات اليوم يمهة..

عمر: سارة ..علي يلا جهال نرجع للبيت ..اروح اخذ ليان وليث من جوارينة..

زينة: سارة تمر تأخذهم..

زمن: تجاهل عمر زينة وجان باين الزعل منهة..

حجة ويا علي وانطاها ظهرة...

حسيت ب**رتهة..الدرس الي كان لازم زينة تتعلمة من حياتها مو كل شي بالدنيا عرك مو كل الحجي ينكال لان احتمال يدمر حياتنا وحياة الحوالينة بنفس الوقت ميصير نگول لشركاءنا احنا سوينا كذا وفعلنا كذا..

لازم المسامحة خالصة او ناخذ إجراء ونخلص هذا الأذى العايشينة مو محملة وبعدين ينفجر جوانا بركان ميهدأ..

ومرات نكتم الالامنا وحزنة ونخفي حجي هواي داخلنا لان منريد ناذيالحوالينة وبالتالي نأذي روحنا وبس..وهذا الصار ويايا..

عمر: يلا زمونة..نروح احنا ..اي شي تحتاجين بس دگي علية اصير فوك راسج..

زمن: تسلملي عموري..الله يخليلك جهالك..ومرتك..

عمر: بحدية..الله كريم الله كريم ..

راحو وظلينا اني وزينة الأقطاب المتنافرة هي ملكة اللسان الطويل وإني ملكة البرود وعدم الاهتمام..

كعدت بركن الغرفة ضايجة ومقهورة..صحتها..

زينة..زينة..

تعالي...حبيبتي..

زينة: مسحت دموعها عمود لااشوفهم..

هلا..زمونة تريدين شي...

زمن: تعالي كوميني مليت من الگعدة..

زينة: بس مو الدكتور كال ارتاحي..

زمن: المعدة مرح تأثر بس سنديني..

ماااشي..يلا..شوي شوي..

مااعرف حسيت محتاجة حضن..رغم اني اكثر وحدة محتاجتلة بس حضنت اختي وحاولت اخفف عنها هي مامنعت دموعها تنزل وتبجي..

زمن: لاتخافين رجلج يحبج ويموت عليج ..بس انتي لسانج طويل..

زينة: اني ..لساني طويل..بعدت جسمها ..

جربتها ع كيف لان ايدي توجعني..

وضربتها ع راسها..اويلي ع راسج اليابس تلومين زوجج وانتي ٢٤ساعة شرطي واگف بالباب..

زينة: ع اساس انتي الحكيمة الحبابة..

اووف..اسفة زمن أمانة الله لاتزعلين..

زمن: ماازعل تعلمت عليج..

تعالي بحضني تعالي..

احنا خوات مالنا غير بعض..

زينة: اني اسفة بسببي خربت مصالحتح انتي وسرمد..

زمن: يا مصالحة ..اني وسرمد چنا ناوين نحجي وياكم بشغلة الانفصال مين جبتيهة المصالحة..

عمر كالي هو وعلي وسرمد متفقين..

زمن: لاحبيبتي اول مااطلع منا ارفع دعوة تفريق..كافي الاجاني..

زينة: تطلگين. ..والجهال..

زمن: هو هم ابوهم يريد ياخذهم يريد يبقيهم بالحالتين ماادخل جهالي بحرب بيني وبين ابوهم..

زينة : وإني هم شكلي عالدرب..

زمن: انچبي لاتحجين..عمر خوش عمر..

وهسة تشوفين..

زينة: دومج دافعين عنة بس هذا رجلج الغ*ي كل السمعه ع زوجتة وباقي وياها.

اووف ياليتني ..سامحيني حبي مو قصدي..

زمن: اللي يحب أحد ميشوف ابد عيوبة ...

زينة: كلبج جبير و دائما تلتمسين اعذار للكل..

زمن: انسيوخلينا نسولفس الف عتيگة بلكي يخلص الوقت..

مرت يومين ..باوعت ماكو سرمد مشفتة..وهو يدري البية ..ومااجة اجة علي اخذنا رجعنا للبيت..

فوتوني البنات لغرفتي سألت عالجهال گالو ابوهم اخذهم لان سارة عدهة امتحانات وزينة عمر جابر بجهالهم..

زينة: يلا ارتاحي شوية بين مانحضر الاكل اخابر عمر يجيبنا الغدا..

سارة: زينة البارحة العصر عمر جابلي الجهال وكال نازل للحلة عمود قضية عندة واحتمال ميرجع الا نهاية الأسبوع..

زينة: يعني ..هذا وكتة ميشوف الظروف الي احنا بيها وانتي عندج امتحانات صدك..

زمن: اشش..اش كافي ان*دي ولد صارلة اربع ايام ويانا ..كافي دمرين حياتج بهذا اسلوبج عندج جهال..

زينة: وانتي مجان عندج جهال ذولةهم..

زمن: اش ..اش ..بلا أسلوبج الي رح يضيع حياتج ولاتقارنين نفسج بية اني مجنت أحبة لسرمد ولاخليته يحبني مااهتميت بي كزوجة ،انتي البينج وبين عمر حب وعشرة وجهال لاظلين تراهنين ع حبة الج وانتي چفصين مو كل شي ينحجي ولاتنسين احنا مزوجين إخوة يعني تحترمين اخوتة لعمر حتة لو مو عاجبج . ..

زينة : تريديني استقبل ذيچ بيتي ماعندي غيرة ع اختي هاي هجمت بينج..

زمن : مو هي الملامة وحدهة انتي مو گلتي حاولت ويا زوجج ليش ماقبل ليش ماخرب حياتة..

زينة : لأن..شحدة.؟

لا مو حدة ،هو يحبج ومستحيل يأذيج هذا الفرق..

تعبتيني ..اروح ارتاح شوي بدل حجيج اليغثالله يساعده لعمر عليج..

زينة: زمن..منو علمنا عاد يصير عدنا اسلوب شو امنا بس فتحنا عينة حطت راسها وماتت بقيتي انتي الباردة كل شي ماعلمتينا بس سكتو ومشو وكافي..

زمن: سارة ..اذا صار بية جلطة مرة لخ فبسبب اختج هاي ..شو ولي من وجهي..

ساعات كلام الناس يجرح بس هو اليذكرنا احنا شنو بالنسبة للناس الحبيناهم رغم اني مريضة وتعبانة ومجروحة تركني بنص الطريق يعني ماعاد ولا صلة بيناتنا..نوب اخذ جهالي ميتة شوگ عليهم..

شوي واجتني سارة ..وجايبة تلفوني..

اكلج زمناية هذا شنو تلفونج بدالة..

زمن: شبي..

مابطل يدگ هاي من غير رسائل الواتساب دوخني وقفلتة .

واكو رقم غريب ..مبطل يدك عليج..

زمن: هذولي بنات صديقاتي ميعرفون بوگعتي..

جيبي خل اخابر ..

سارة : ارتاحي اول...

زمن: عفية سدي الباب وراج..

فتحت تلفوني ..

لكيت بي رسائل..

طبعا بنص هاي الهوية نسيت هذا الرقم الغريب الي يدگ علية ..ويدز الي مسجات..

باوعت عليهم..

اليوم ابو الجهال يمكن بس لاتنغرين بي هو يريد يكوش ع البيت عمود يگعد ذيج..

اكو رسالة ثانية ....

سلامتج الف سلامة متستاهلين زمن أن شاء الله باليكرهوج.

رسالة ثالثة...

تعبت ادگ وترفضي..

ارسل الج مسجات ومتردين اني بالي يمج ..

سديت التلفون ..وگعدت افكر منو هذا الي ديدز مسجات ويخابر لا ويعرف كل شي عبالك گاعد ويانا..

استغفر الله لاتكون هاي ايمان...مااعرف شاكة بيهة احسن شي احطه بالحظر ومن يجي عمر اسألة ..

زين اني ليش انتظر عمر ليش ماارد واعرف منو..

لا زمن ..شنو سوالف مروة اثرت بيج بلة چلب بية شون..

شيجلب ..مو اكو قائمة حضر..احطة بيهة..

دكيت عالرقم..وسديتة...

رأسا جاوبني ..واعاد الاتصال..

جاوبت ..صوتي بعده مبحوح..سلامتج كود بگلبي ولا گلبج ...

زمن: انت منو؟

اني واحد قريب الج كلش..

سرممممد..

لهالدرجة تحبي لسرمد..والله ميستاهل حبج ..انتي تعرفي شيحجي عليج..

زمن: رجاءا هذا الرقم لادگ علي بعد ..

ع كيفج اعصابج ..مو زين عليج التوتر..

كتلك لاتخابر هاي اخر مرة تدك ع رقمي ..

اني ليش اتعب روحي تفضل البلوك..

سديت التلفون وحطيتة بالحظر بس انقهرت من كم كلمة مالهم معقولة سرمد هيج سرمد يحجي عليه ..

اني ليش استغرب ورا كل سوا بية ..

زين منو هذا ..

خل بس اگوم ع حيلي وامحي هاي الصفحة من حياتي بعد مااريد شي ..

فتت ع صفحة البنات كوم رسائل..

راسلتهم ودزيتلهم صورة الكانيولا باايدي.

عبير: ولج هاي شنو ..

مروة: صدگتيها مريضة تلاگيها ت..... ويا سرمد وتگول مريضة..

زمن: حجي البنات جان كلة قوي واكو فشار بالموضوع صح جنت متجبجبة منهم بس مرات هيج ناس هم فاهمين الدنيا ويعرفون يتعاملون وياها..

مالهم عالعركة وانكلبت المحادثة فشار ومسبة ع ايمان..

وع حظها وشون مااخذ كلام اخو يمكن مسويتلة سحر .

عبير: مو بعيدة على هالاشكال الا هاي مروة الگ..... مينعجب بصوتها وهي موگعة الف قبلة..

مروة: اي والله خرب مستقبلي حتة رجلي رح اطلگة.

زمن: صمالله ليش مو گلتي يحبج وبينكم علاقة حب..

مروة: مليتة صار هواي خ نشوف واحد مرتب وحلو..

زمن: بمناسبة الحلو اكو واحد صار كومة لازگلي..ويدز رسائل بس تگولين گاعد نصنا .

مروة: اوگفي اوكفي هاي من شوكت...

عبير:رح تستلمج فشار...

زمن : جنت مريضة ..عموما اني اعرف المحروس يحجي لمرتة وهي شوف منو دازة عمود توگعني يجي عمر واگلة..

عبير : وليش تگليلة لحماج خوب روحي للطلي المزوجتة خل يشكم مرتة ..لاظلين فطيرة ..بيتج وهجمتة واخو وخلتة يتعارك ويا شتردين بعد بلكي يصحى..

زمن: اني مااريدة يصحى خل بس اگوم ع حيلي وارفع دعوى طلاق..

عبير: هيج تخسرين..

زمن: شااخسر ياعبير اني خسرت زواجي واولادي وصحتي فوگاهة ..

مروة: تعرفين شنو رأي عمود ترتاحين..

زمن: شنووو؟

مروة: رزق وجاي لعندج اخذي راحتج بالحجي وهسة ايمان توصلة..وهيج يظل طول عمرة يفكر هو گرن وانتي خنتي..وانتي ترتاحين ترجعيلة السوا بيج..

زمن: شكاعد تحجين اخون وإني متزوجة مسويتهة وإني بنية اسويهة وإني متزوجة..

لا..مستحيل..وسمعتي ..مستحيل افرط بيهة گدام جهالي خواتي ..

مروة: انتي واحدة غ*ية متشوفين سمعتج جگد فادتج.. وباعي ذيج لعبت وتونست واجتي اخذت الطرن رجلج الي تعارك حتى ويا اخو عمودهة مكال سمعتهة..

عبير: مروة لاتضوجيهة طالعة من المستشفى..

مروة: گلتلج اني يازمن اذا ماانتقمتي ظلين عمرج كلة تتحسفين وهو عايش مرتاح..

زمن: اگللكم بنات اني تعبانة بعدين اخابركم ادز الرقم وانتو سوو الواجب..

مرات بحياتنا على الرغم من ذكاءنا وتميزنا للصح والخطأ وكل شي يگلج اكو خطأ..

بس انتي الراحة الي لگيتيها تخليج تسكتين..

وهذا الي شفتة بمجموعتي كلهم متزوجاتبس زواجهم غريب طيب كلهم ماعدهم جهال أو ذابين أولادهم ع ازواجهم طيب مايشوفون جهالهم..حجي مروة خلاني أسأل روحي هاي الأسئلة مع هذا اشوف بااسئلتهم وتوضيحهم للصورة صادگات سرمد عن منو يدافع وتوصل بي يضرب اخو اني رح اظل متگلاية احسن اطلگ ولا اكعد اراقب سرمد..

خابرت ع عمر..صدك عندة شغل..

ميخالف أحجي ويا..

زمن: الووو..هلو عمر شونك..

عمر: خلو زمونة شونج حمدالله على سلامتج..

ليش هيج رحت مااستقبلتني..

عمر : اسف زمن علاوي موجود عندي شغل ضروري..

زمن: وشوكت يخلص هالشغل .

عمر: مااعرف زمن..

زمن: عمر ..زينة باقية بيتي لاتخاف مترجع ..

عمر: لا خل ترجع بيتهة وتشبع بي..

زمن: العصبية هاي معناهة زعلان..

زين اذا گتلك اختك محتاجتك بشغلة..

عمر: خير..خو ماكو شي..

زمن: محتاجتك بشغلة ضروري بس تعال..

عمر: عيني الچ..بس اخلص هاي الدعوة هنا وارجع تحتاجين شي..

زمن: سلامتك ..يلة مع السلامة..

فاتت زينة..

هاي چنتي تحجين ويا عمر..

زمن: اي ويا عمر..

زينة : اياا...ادگ علي ميشيلة..

زمن: تستاهلين شوي تربي..

زينة : اهووو..وشگالج شوكت يشرف..

زمن: مشتاقتلة..؟

زينة: خ يولي..هذا شنو اشتاقلة..

زمن: لسااانج...

زينة: اي مشتاقتلة كلش وهو زعلان عليه ومكبر راسة..بس شون زمن خاف يعوفني..

زمن: دقيقة بس اكمل..

شتكملين ..

دا احجي ويا عمر..

زينة : دتضحكين علية ..كليلة كل الحجي الكلتة كذب وان شاء الله يروح ميرجع..

زمن: هههههه ..يمكن يلگالة وحده حلاوية بنت اوادم ..وماعده. لسان..

زينة : هو الگلج خ يروح لمستواه بسيطة..

زمن: اشرتلهة طلعي برة..

زينة: كليلة شوكت ترجع لازم نطلك..

زمن: انچبي وروحي..

معليك بحجيها..

عمر: اعرف مخبلة ..يلة روحي اني هم عندي شغل..

ظلت زينة تاكل روحها وتلومني..علي سويتة .

بس السويتة عمود لا تخطأ خطأي ..وتكتم مشاعرها لحد مايحس ماكو مشاعر..

هاي الليلة حيل طويلة تعبت بيهة ..

وصيت علي يجيب الجهال..طلع سرمد مطلعهم للشمال..

انقهرت أكثر يعني اني اصارع المرض وهو گاعد يتونس...بسيطة..

مرت ايام ..رجع عمر ..جان زعلان ع زينة وميحجي وياهة فتنا وكعدنا نحجي..

زمن: عمر ..انت مو دائما تحول اني اخوج وبظهرج..

عمر: طبعا ام حسين ميحتاج رأي..كولي امري شتردين..

زمن: عمر ..اني وسرمد وصلنا مرحلة سيئة بزواجنا ..وصار لازم نحط النقاط عالاحرف...

عمر: يعني؟

زمن: انفصل عنة ..واريد اصير محامي..

عمر: زمن ..تعرفين موضوع جكد حساس..

وإني وسرمد علاقتنا كلش سأت بسبب المشكلة الأخيرة مو ناقص اخرب اخوتي ويا واعرف وياج الحق بس عذريني احنا مالنا غير بعض وان دارت بينا السنين..

زمن: فهمتك عمر وإني اسفة طبعا ..

عمر: ممكن اوصيلج بنية صديقتنا عالدعوى اذا هاي رغبتج وقرارج..

زمن: طبعا..ماكو غيره بعد..

عمر: انطي فرصة يمكن..

زمن: اني مااريدة طلع من عيني..

عمر: فهمتج رح أحجي ويا البنية واردلج خبر يلا رايح ..

وين رايح .اكعد تغدا..

لا شكرا مااريد..

اكعد اني اريد احجيلك بموضوع ثاني..

شنو هو..

انت وزينة ..ميصير تلفون هيج..

ترة زينة حيل تعبانة..

تعبانة. .زمن لسانها اطول منها، اصيح عالجهال وتضربهم .ترة اني هم تعبت من المشاكل

زمن: ميخالف لخاطري هالمرة ...ماعندي خاطر..تأخذ مرتك وتحجون بالبيت وتتفاهمون..

عمر: مااشي ..زمناية لخاطرج هالمرة وكليلهة اسلوبهة تبطلة واخواني خط احمر ..

گتلهة عمر ،بس بأجر عكبة مو تكللهة اختج وباوعي وهذا البيت يظل مفتوح ومثل لمتنا المعتادة ..

اجة علي ..سمعت لمة و*دا فرحت يلا نرجع مثل قبل..

باوعت ع عمر زين مو مثل مااتفقنا ..

المهم نهاية اليوم تجمعنا واكلنا سوا وكلمن راح لبيتة ورجعت لوحدتي ..

صعبة تعيش وحدك أو تعيش ماكو لمة حبايب ولاحضن حبيب..

استلقيت ع فراشي دگ رقم غريب ثاني..

وهنا مااعرف شنو الحلاني اجاوب واحجي ويا .

للقصة بقية ..

تحياتي الكم..

نازك الملائكه