قلوب تائهة

الحكاية الاولى ج٣

ثمّة أناس لهم تلك القدرة الخرافية على المشي فوق قلوب الآخرين دون شعور بالذنب.

دائما اذكر مقولة مااعرف اتصور لوليام ش**بير يقول فيها ( المرأة لاتتوقف عن الحب لأنها عاجزة عن الخيانة ولكن الرجل يحب لأنه تعب من الخيانة )

لمن توگع بالبئر وتت**ر اوصالك مااعرف شنو النجاة بالنسبة الك شخص يمد ايدة ويطلعك من البئر وانت مت**ر لو تبقى بالبئر لحد ماتموت بدون محد يحس بيك ، بس لمن يحضرك الموت رح تكون م**ور گلب وروح ،وهو هذا الكنت حاستة اني وگعت بالبئر ومااعرف لو باقية مستغ*ية الموضوع ومشية اموري وبس روحي تتعذب لو تنكشف ومعاد يهتم اذا يجرحني لان معرفتي للموضوع وبقائي يعني راضية وماسحة بكرامتي الگاع..

وهسة وكت المواجهة....

صوت طبة الباب رغم خفتهة خوفتني شو لازم اسوي شون اتصرف التفتت التفاتة خفيفة ...جان سرمد واكف..والكلمات هم خانتة مو عارف يحجي ..

كعدت عالسرير بغرفتي وسندت ايدي ع جانبي بلكي اقوى . .

تقرب سرمد..

سرمد: زمن ..انتي من يمتى تعرفين.. يعني منو گلج..اني احب تعرفين..

زمن: ماكو داعي محد كلي اني شفت بعيني ..ومو هامني..

سرمد: زمن ..انتي لازم اسمعيني اني..

زمن: مااريد اسمع ..الي رايد تسوي سوي..

يعني شنو زمن اني ..

زمن: قبل ..ماحجيت بالموضوع عمود هاي العائلة تبقى واكفة ع رجليهة سكتت ..اخذت نفس..

وبعدين شفت الموضوع كلة مو هامني ..

ومادام حجت زينة وصار حجي عالم وناس وانت بكل وقاحة مامستحي..خلص لاتبرر ولا تقدم اعذار ..

سرمد: ماكو اعذار ،زمن ..ايماااان..

مجرد ذكر اسمهة هدني شون اكدر اكتم هذا الوجع مو كادرة..

زمن: سرمد..ماكو داعي تحجي الموضوع واضح وخالتي الله يرحمها كالتلي وإني ميهمني كتلك ..

ومااريد هذا الموضوع يأثر ع حياة خواتي نفهم اخوانك وخواتي انو رح منفصل وخلص...

سرمد: انفصال..ومنو كلج اني اريد انفصل انتي شون تفكرين هيج بزواجنا..

زمن: زواااجنا..يازواج هذا...سرمد..

احب اكلك موضوع الطلاق كان لازم يكون من اول سنة مرت علية وإني حاسة روحي قطعة حالها حال اي قطعة أثاث..

بس ياترى هي زوجها عادي عندة زوجتة هيج..تطلع وتطب وتلزم ايدك ومو خائفة..

سرمد: منفصلة..هي انفصلت عن زوجها لان هي تحبني..

زمن: اخ ..ياوجع كلبي بس اوگف لاتتاثر لاتخلي هذا الكلام يجرحها..

لاتخلي عشرة ١١ سنة تروح هيج..وهو يحجي بحزن ع حبيبتة المغدورة..

سرمد: زمن..ايمان طلگت بسببي ..علمود حبنا..

زمن: بعصبية..گتلك مايهمني اني وياك رح ننفصل..

سرمد: اني مأكدر انفصل عنج..شلون تريدين انفصل مااگدر ..

زمن: كااافي..لاتخاف ولاتضوج اني ابصملك بالعشرة روووح..

سرمد: زمن..جهالنا.. اخواني...

زمن:لاتخاف..مرح يأثر علينا شي..بس اني وياك خلص..

سرمد: زمن اني مااريد..

زمن:سرمد..اطلع من غرفتي معاد لازم تبقى ..قبل سكتت وبقيت بس هسة مااگدر رجاءا ولارح أحجي عليك ولا الومك بس اطلع..

سرمد: زمن ..

اطلع بس...

بالنهاية ..اخذ الباب وطلع وأحس قلبي كانو أكوام من الزجاج المت**ر..

جگد توجع..

اوووف..تموت الخيانة ..يموت الفراق..

تعب وسهر ورعاية هيج تروح ادراج الرياح..

راح حبي وتعبي..اريد اصرخ بس كرامتي حيل توجعني ..الناس تحجي بقوتي دائما يحجون جكد ماان**ر ..ليش احس روحي م**ورة ومو گادرة اتحمل..

طلع سرمد واجتي زينة شايطة وسارة مخضوضة وخائفة..

زينة : راح الشفية ، تعاي فهميني شنو تعرفين ..انتي تعرفين الي شفتة شسوة بية ولج زمن گاعد احترگ وانت أبرد من البرود نفسة كلت فات وراهة راح تملخة راح تطيح حضة شنو ..شبيج ليش ساكتة زمن ،اني شفتها ردت اكرطها بسنوني انتي برودج هذا شنو خبلتيني..

زمن: زينة ..كااافي ..كتلج لاتدخلين..

زينة: هذا شافج فقيرة وعبالة ماكو احد بظهرج واستفلگ كال المن تروح للاخ ولاعم ولاخال..ااااخ ربي..

زمن: كااافي زينة اني وسرمد رح ننفصل..

زينة :ااي ..هيج كولي ..وهو شگالج اكيد كيف..

سارة: زينة هدي اللعب شوية دتشوفيها مصدومة..

زينة: ولج يامصدومة هاي تعرف من زمان وساكتة..

باعي انتي وإني وسارة نطلب الطلاگ..

سارة: ليش صمالله نطلك ..زينة شهالحجي...

زينة: لعد نعوف اختنة تنذل..

سارة : مووو..هيج..

لا هيچ..اني من زمان مو عاجبني هالوضع نلم جهالنا ونكعد وخل اخوانة تخدم عليهم ايمانو ..

صرخت من الوجع اوگفو اني بشر ..سجاجين تطعنوني بيهة تسمون مداراتي الكم خدامة اشكرج زينة ..

زينة: زمن حبيبتي مو قصدي والله اني من حرگتي عليج ولج هذا شون ي**نج نسى شسويتي علمودة جكد ضحيتي وتحملتي تالي هيج يجازيج..

زمن: اسكتو ..كافي مااريد اسمع صوت أحد..

اندگت الباب..

زينة: سارة ..شوفي منو هذولة الجهال..

انفتحت الباب..جووي عمر وعلي..

زينة: اجوي الابطال شعدكم جايين ترة احنا ع عملت اخوكم مباقين احنا الثلاثة..

علي: واحنا شنو ذنبنا.

زينة: خلص هيج لازم يصير ..مو هيج سارة ..

زمن: زينة مالج دخل..

عمر: بالضبط ..مثل مگالتلج اختج مالج دخل وتفضلي اخذي سارة وطلعي..

زينة: تريدون تقشمروها..

عمر: زييييينة..طلعي برة ..

اشرتلها ..طلعو ..

عمر: علي سد الباب..

مااااشي..

عمر : زمن..ام حسين ..انتي ست العاقلين هذا البيت واكف بفضلج واحنا اخوتج ..احنا ربينا ع ايدج..

والله اشوف ريحة امي بيج..

لاتضوجين ولاتزعلين ..والله احنا اخوتج وبظهرج ..هاي نزوة وكل انسان يغلط..

والغلط يتصلح..سرمد شاريج ذيج شنو ..

علي: والله اذكر حفت باايده ورجلة عمود تزوج سرمد وابوية وامي مقبلو..

لاتعتقدين..

قاطعتة..

عمر...رجاءا..لاتحجين بالموضوع مااريد افتحة اني وسرمد خلص خلصت قصتنة ..

علي: گولي بالله ام حسين..

عمر: زمن ..تعرفين جگد غالية علية والي يمسج يمسنا لاعبالج راضي باللي سوا اني اخوج..وبظهرج واللي يجرحج يجرحنا..

علي: اي زمن انتي اختنا الچبيرة ..واحنا وياج ..بس انتي لاتهدمين بيتنا..

زمن: لاتخافون..انتو وعوائلكم مرح يصير شي المشكلة مشكلتي اني وسرمد انتو مالكم علاقة بيهة ..

عمر: شهالحجي زمن ..السالفة مو بس سالفتج هاي شنو من البين ...هسة نلزمة ونحط حد لهالخربطة المالهة داعي ..وانتي تظلين معززة مكرمة..

زمن: يامعززة عمر..يامعززة اني اذا بقيت اكون بلا كرامة..

عمر: حشاااچ شحدة الي** كرامتج واحنا موجودين ..هسة لازمة واحجي ويا ..واخيرة لو هي لو احنا..

زمن: قصدك تعجزة لو يعوف البنية اليريدهة لو يختارني ويختاركم شنو الفائدة اذا مجان من كل گلبة ..وبعدين هالموضوع قديم وإني تحملت عمودكم وتمنيت يتغير شي بس مادام الموضوع انعاد خلص اني مااريد خ يروح يتزوجهة ومعلية بي..

علي: زمن يازواج هذا وولدة شكبرهم ويتزوج هاي ..مستحيل .مستحيل..

زمن: عمر ...دايخة حيل وتعبانة دخيلكم اعفوني وخلوني وحدي..

عمر: مااشي زمن ..بس لاتستعجلين وشوفينا شون نحلها..

زمن: مااريدكم تناقشوني بالموضوع ولاتناقشو يلي ١٢ سنة راحت مانساها رح ينساها هسة بس مرح ينسى جبرنا على هيج عموما اني ورا ماطلع فكرت ولازم مااسوي شي يضر اولادي ولايضركم مااريد انفصل بطلت..

عمر: اي الحمدلله عين الصواب ام حسين ..انتي ست العاقلين ولو يلف الدنيا ميلگى اظفرج..

علي: خلينا نتركها ضوجناها هواي..

زمن: ياولد اخذو نسوانكم وگلولهم لاتوصلوني ولاتحجون وياي بالموضوع..

عمر : حاضر..

صح كنت منتفضة وثائرة عمود كرامتي بس لمن شفت موقف زينة وخوف سارة

تراجعت خفت لاتدميري لحياتي يكون سبب دمار حياة اخواتي ووردة بنتي منو رح يجي يخطبها وامها مطلقة لذا گعدت الليل كلة افكر وگلبي يم ذاك الباب هسة ينفتح ويفوت سرمد مو عوايدة يسهر ولايبقى برة البيت ..

لايكون متزوج ايمان وإني نايمة بالشمس..اي يمكن يمهة وهي گاعده تواسي وتقنعة ينساني..

ضحكت ع روحي، شنو ينساني ليش هو يذكرني عمود ينساني..

مرجع للبيت مرت يومين من السكوت المخيف وإني بالي نايم ماكل شارب يم ذيج ، واخيرا اجة كعدو الولد ويا وحجو يمكن وقتة تأملت ..تأملت اكون مهمة أو موجودة لكن فجأة وسط تأملاتي ثار سرمد وتعارك ويا اخوتة وصار الخائفة منا..

سرمد: انتو شنو..كاعدين تحاسبوني اني اخوكم الجبير..اخوكم مو زمن اختكم ..

وانتي ..اشرلي بعصبية ..تريدين تطلگين..

مااطلگ اني رجال واللي اريدة اسوي رضيتي مارضيتي ..وطز بالكل..

جنت واگفة اسمع كلامة وسهام متوجهة لكل جزء بجسمي ..

وزينة تغلط وتحجي وتانبني ..حسيت ثورة داخلي..

محسيت شون خطواتي تقدمت ..مااعرف هو اني خطأت وكتها لو لا..

وگفت كدامة..

سرمد..باوع مو تريد تزوج ايمان..روح تزوجها روح ماكو داعي تصيح وتجرح جهالي ..وتريد تجرحني ..ترة انت مو هامني ضحكت بااستهزاء ..

ضحكة بيها دموع ...

ترة لاعبالك رح ازعل ولااضوجج ابد صدكني..

اني من أيام المرحومة اريد انفصل عنك بس أبوية والمرحومة امك هم واگفين بطريقي..

هسة روح انت لاتخلي أحد بطريقك اني ..

مووو ..هامني..فاهم مو هامني..

فجأة حل السكون أجواء الغرفة..وإني تمسكت برباط جأشي ..حاولت ابين مثل ما دائما يشوفوني قوية بعد هالحجي جان ودي اصرخ واصيح ...

ان**ر بس ماسمحت لروحي ..

قفلت باب غرفتي ..اطلع لمن يطلعون اهتم بااولادي احاول اكون الهم كل شي اعوض تعبي بيهم ..مباقلي غيرهم..

وحاولت اتناسى وجود سرمد الي مااعرف مكانة..

كلها اسبوع واجة كال لااخوتة اني خلص عقدت عقد سيد..

وكولولهة لزمن تفرغ المشاكل الفوك رح اكعد بي عمود اكون قريب من اولادي..

عاد الولد ثارو ومقبلو ..وعلي اقترح يتبادل بحصتة ويا سرمد ويجون هم يكعدون يمي..كرهت هذا الوضع كلة كرهت ضعفي واكثر شي كرهتة بية نظرة بنتي وردة وهي شايفتني لاثرت ولاطالبت بحقي ..

اكتفيت بالسكوت ..

كلها اسبوعين ..واجوي بيت علي رتبو غراضهم وگعدو يمي..

سارة جانت تساعدني بالجهال وإني مثل دوري قبل ساكتة ،الشرطي مال بيت..بيتي مفتوح للكل..ننجمع ويظل مكان سرمد فارغ ساعات صدك اريد وسط كعدتهم ابجي..نفسي أحد يطبطب علية يحس بوجعي..بس الكل يكتفي بالشفقة ومتضامنين ويايا ..

محد زار سرمد ولا سرمد كام يفوت للبيت لان الحصص كلها الي ماعدا حصة سرمد صارت لعلي ..

كمت اروح للكلية وارجع بس داخلي ان**ار الجوارين كلهم يعرفوني بس من يشوفون مرة سرمد..اسمعهم يكولولي ياعيني...متستاهلين انتي الذهب يعوفج ..

تعبت ياربي مامكتوبلي ارتاح..

لو بس يعفوني من شفقتههم ممحتاجتة والله اني قوية ومرتاحة..

بس خل يبتعدون عني..

مرات احس بالوحدة احس روحي وحيدة حتى لو بنص كوم عالم ،وحيدة وسط اخواتي واهلي واولادي كانو عالمي انسرق مني..واحد من اولادي انسرق مني راح لغير وحدة مااعرف رح تكون حنينة رح تغطي رح تخاف علي معقولة مرتاح وياهة ونساني..

ضاع حبي ،ضاع دلالي..

ارجع اصفع نفسي صفعة اصحي لاتن**رين انتي قوية لاتنهزين ظلي البسي قناع القوة ولاتخلين أحد يشمت بيج..

ادخل بغرفتي وأحس بوحشة اي حنين علي حنيت لوجودة ودهريتة وياي ..

زمونة تعالي فركيلي ..

فدوة زمونة فوتي وياي غسليلي...

زمونة بيج فد شي حلو مااعرف شنو هيج قارورة تذب عسل اطيني بوسة..

ليش ..ليش..شسويت اني..تعبت.. تعبت شوكت انساك شوكت ابطل افكر بيك شوكت تروح لوعة گلبي عليك وانتي مرتاح وسعيد تطلع وتطب تفوت من يمي ماتشتاگ ماتحن علية..

اسكتي زمن ..اسكتي سنين وانتي تحاولين سدين فراغ بگلب سرمد ومامليتة ..ظل گلبة يمهة ووياهة عمرة مكان الي..

زين اني بية شي مو حلوة حاسة روحي مريضة..

كتبت عالفيس زوجي خاني وهجرني شااسوي ..؟

طلعت الي كوم خيارت..لفت نظري گروب اسمه قلوب تائهة واكو أسئلة جاوبين عليهة وبصمة صوت لازم تدزيهة وظليت انتظر وأكلب محد ردلي..

ورا يومين لگيتهم موافقيلي..

فتت كتبت ..واجتني كوم ردود ومساندة..

واكو بيهم شجعوني اردلة الصاع صاعين داخل هذا الگروب كروبات وإني اختاريت مجموعة ..وگعدنا ندردش..

اتصور اكو درجات بالگروب وبعدين فهمت شنو هي ..

المهم صرت جزء من هذا الگروب وكعدنا ندردش ونتناقش واسمع قصصهم..اطلع وياهم صدك نسوني لفترة اول شي سوليا نصحوني اهتم بروحي اخذوني لصالون صبغت شعري سويت حواجبي تاتو نصحوني البس ملابس تبيني أصغر مو لبسي الرسمي وبنطروني القماش هواي اشياء غيروها بية مچنت مهتمة بيهة ..بديت احس بروحي والكل منتبهة تغيري ..

بدلت سيارتي ..

مرت ٥شهور محسيت شون مرت ..

ظل بيتنا مثل ماهو جمعاتنا عزايمنا الولد يطلعونا مرات ادز جهالي وياهم واروح ويا البنات..

وصلت لمرحلة تناسيت وجود سرمد بحياتنا اني واولادي..

مرة جنت طالعة ويا صديقاتي وشفت سرمد ويا ولد ..فاتو للمطعم ..البنات الويايا يدخنون ..اول مشفت سرمد احس كلي اهتز ترخصت من البنات اريد اطلع مااعرف خفت..

دا اطلع اجة سرمد لزم ايدي..

زمن..زمن..

تعالي..

زمن: سرمد..عوف ايدي ..

هذولة منو وشوكت تعرفيهم..

وانت شعليك شلك دخل..

زمن لاتخلين طيوري تطلع عليج دا اسالج سوال لاجاوبيني بسوال..

تقربت منه لدرجة شم العطر الحاطتة..

مثل مكلتلك انت شعليك اني اطلع واطب مثل مااريد وانت مالك دخل..

فلا ايدي لمن اجة صديقة شاب أربعيني..

صاح سرمد شكاعد تسوي عيب عوف البنية ..

سرمد: علاء ..هاي زوجتي عندي كلمتين وياها..

لا..مرتك ..منو منهن ام حسين لو ايمان..

هزتني كلمة علاء كنت أعتقد علاء هي ايمان وايمان هي علاء طلع فعلا موجود..بس..

استفزني سوالة..

عفت السيارة تقدمت مديت ايدي..

اهلا وسهلا بيك سيد علاء اني ام حسين ..

وهو ظل يباوع ع سرمد محرج متفاجئ

بس ظل مركز بية ومعجبني نظرتة آلية..

اما سرمد ..فااول ماوصلت لگيتة كدامي ومصيح ومعيط لمن عرف اني اطلع واطب ولفترات طويلة..وهنا قامت القيامة حسيت شوي بردت لمن شفت غيرتة بس زيادة الملح تخرب الطبخة وهذا الصار وياي..

للقصة بقية..

تحياتي لكم..

نازك الملائكه