صف البنزين

الفصل السابع

التفت بسرعه ولطشتو كف !

قلت ليهو كيف بتتجرأ يا يمان تدخل غرفتي وتعمل كده !

انت قليل ادب وما محترم تافه حقي.. قطعت كلامي و

اتفاجأت لمن شفت دموعو وعيونو حمممممممر .قلبي اتقطع عليهو ولوهلة قربت احضنو بس اتمالكت نفسي وقلت ليهو

او دموعي َنزلو من عيوني يمان لو سمحت ليهو اطلع بره من غرفتي !

عاين لي مسسسافه جوة عيوني كأنو كان بفتش عن اجابه لسؤال شاغل بالو وخلاص قرب يفضحني بنظراتو بس دنقرت تحت وقلت ليهو يمان ...... بره قلت ليك

#

اتذكرت لمن كنا بنطلع سوا طول الوقت بشتغل لي

صلحي توبك ده يا بت شعرك كلو بره!

صلحي مشيتك دي كنت بقول ليهو

بس ماف زول في الشارع !

بحدر لي مسسسافه طوالي صلحت التوب سرعه سرعه وبعدل مشيتي

بهددني لو لبستي الاسكيرت حقك الضيق داك والله بحرقو ليك فاهمه !

بقول ليهو بس الاسكيرت واسع يا يمان !! بنهرني طوالي :

ي بت انقبك يعني !وانا بخاف وبقول ليهو

خلاص خلاص ما حألبسو تاني بس النقاب لا ما تنقبني

والله عندي لحظات جميلة جدا مع يمان كان زول غيور لدرجة شديدة وبرغم من اني كنت بخاف منو لكن كنت بكون مبسوطه لانو بغير علي كدة.. خفت انو كلام خالد اخوي يطلع صاح واكون فعلاً استعجلت لمن وافقت على شاهين لكن انا اسي خلاص اتزوجت ولازم انسى الزول الاسمو يمان ده واطلعو من حياتي

#

لمن اتمكيج ساي كان بقعد يشاكل فيني النهار كلو

اووعاك ثم اوعااك تعملي الروج الاحمر ده تاني وتقولي طالعه بيهو فاهمه "!

قلت ليهو

اسي الروج عيبو شنو ياخ !

قال لي كلمتك انا اوعك اشوفك عاملاهو تاني

و لو شفتك مرقتي بيهو الا اقطع شفايفك بسكينه ميته فاهمة ولا لا

كنت برجف زي الورقة وبول ليهو فاهمة والله

##

مره قال لي نكته قومي يا انا اتهوري و اضحكي بأعلي صوت عندك يا جوري والله قرب يقشطني كف !! قال لي حسك عينك تاني تضحكي في الشارع مفهوم ! مع انو هو السبب في الضحكة بس ما مشكلة

صاح يمان كان صارم معاي بس الصفات دي لازم تتوفر عند كل راجل والا ماف داعي ليهو

.ما تستغربو مني لكن من ساعة الحصل وانا يومي ذكريات يمان بتطاردني زي الشبح ! وكل ثانية ضميري بانبني وبقول لي شاهين ما يستاهل تفكري في واحد غيرو هو راجلك حلالك

بقيت عايشه مع شاهين جسد بلا روح ودايما شارده والله الموضوع ده مؤرقني شديد وحاسه بذنب رهيب ما يعلم بيهو الا ربنا لغاية في يوم عرض علي امشي اتم يومين في بيتنا لانو شافني متغيرة وحب اني اغير جو

رحبت بالفكرة وقلت اصفي ذهني الفترة دي واشوف لي حل انسى بيهو يمان فسوقت معاي زينة لأنو زينة بقت جزء لا يتجزء من حياتي وما بقدر يوم بلاها كانت البت الانا ما ولدتها والاخت الصغيرة الياما اتمنيت يكون عندي ليها كانت روحي وحياتي ودنيتي

هناك صبا ما ريحتني نهائي وشغاله تسألني لسه ما بقيتو 4 ؟؟؟ قلت ليها لسع.. صبا عايزه اسالك

صبا فهمت سؤالي قبل ما اسال قالت لي يشهد الله انا تاني لا لاقيتو لا اتكلمت معاو م تخافي وقفلت الموضوع ع كده

بس برضو كان شاغل بالي لكن قلت هي وضميرها

قررت لمن ارجع البيت حأعرض لي شاهين نمشي لدكتور نشوفو الحاصل شنو وليي الحمل اتاخر كده وبعد

تميت اليومين بخير وسلامه وشويه كده بديت انسي يمان حمدت ربي قلت دي نزوة عابرة ساي

جا شاهين المساء زي الساعه 9:34 عشان يرجعنا البيت

وبعد اتعشينا طوالي طلعنا وكالعاده زينة نامت في يدي وكانت بتشخر ساي ضحكتنا انا وابوها

شالها مني وومشي قدامي وداها غرفتها

مع دخلتي الغرفه تلفوني ضرب لقيتو رقم يمان !! الظاهر هو عاوز يوديني ورا الشمس كيف يتصل علي في وقت زي ده اسي لو التلفون ما في يدي او حتى لو كان شاهين موجود.. لاحول ولا قوة الا بالله العلي العظيم ربنا يجيب العواقب سليمه قفلت التلفون وختيتو في الشاحن.

شاهين جا داخل وهو مبتسم قال لي مرتي نورتي البيت

قلت ليهو بنورك يا قلبي اها الشغل ماشي كيف وامورك كيف؟؟

مشيت ع الدولاب وفتحتو كنت واقفه وبطلع في دهبي عشان اختو في العلبه ومدياهو ضهري وانا بتكلم وهو كان ساكت

واتكرر الموقف وحضني من ورا وقال : مشتاقك

اتذكرت يمان وحركتو د*ك جاتني رعشه وزحيتو مني دفرتو بعيد

اتفاجأ من حركتي قال لي : مالك يا جوري خير في حاجه !!؟

ما عرفت اقول ليهو شنو اتختيت في موقف محرج عشان كده ضحكت وقلت ليهو جبيل شفت فلم رعب في بيتنا واسي اتخلعت ما اكتر من كده

ابتسم وقال لي عشان ما حضرتي معاي ما كنت حأخلي الخوف يتملك على العموم انا ماشي المكتب انتي اخدي راحتك كويس؟

ارتحت كتيييير لمن قال ماشي قلت ليهو حاضر ما تساهر وما تتعب نفسك..

قال لي طيب وطلع

*

ما عارفه كيف كيف اجازتي انتهت مني اتصلت علي قالت نشدو الرحال

اليوم كان خميس وحنسافر السبت والدراسه الأحد..

شاهين: خير منى مالا ؟؟

قالت لي نسافرو خلاص

شفت الحزن مرسوم علي وشو....بعدها قال لي : هانت...كلها سنتين وتكوني أحلي خريجه

قلت ليهو الله يسمع منك

يوم الجمعه طلعنا انا وزينة وابوها...قضينا احلي يوم ...

مع رجعتنا المساء جينا بشارع الدكاترة...

قلت ليهو اقيف هنا..

عاين لي مسسسسافه وقام ركن...قال لي في شنو ؟؟

قلت ليهو مرو اكتر من 4شهور...وماف أثر لي حمل...لازم نشوف الحاصل شنو يا شاهين

قال لي وانا شكيت ليك عاوز طفل ؟؟ وله شوفتيني في يوم من اﻷيام سألتك ؟؟؟

سكت ودموعي نزلو

قال :يا الله !!! اسي الببكي شنو ؟؟؟؟

انتي عارفه..احيانا بتلخبط بينتاكم انتي وزينة

طوالي ضحكت .

دور العربيه وقال : ضحكتك عملت فيني عمايل !! كن عارف كان خليتك زعلانه وبي دموعك

قلت ليهو بتطنطن بتقول في شنو يا أبو زينة ¿¿

قال لي ولاشي حبيبتي ..بس قلت:

اقيفو في الصف

سافرنا للجامعه...السمستر السابع كان عصيييب ...القراية بقت صعبه عشان كده لازم الواحد يقرا اول بأول...

مره قاعدين انا والشله تحت شجرتنا...سامعه البنات بقولو.: لكن آمانه ماا...

نهله : ده من بني بشر ؟؟؟ عسجد : كدي دقيقه... ده منو !!

مآب : المشكله ما هنا..المشكله انو جاي علينا !

عاينت لي منى راجياها تنبرش هي التالته..اتفاجأته لمن شوفتها بتعاين في المدخل وبتعاين لي ...

طوالي انا زاتي عاينت..لقيتو ده يمان زاتو بشحمو ولحمو وعضامو.

يمان كان ملتحي..واسمر ..حواجبو مقرونة ومن شكلو كده زول هادئ وغامض وما اي زول بقدر يفهمو ..لكن انا كنت فاهماهو...فاهمه كل تفاصيلو .

كيييف ما أفهمو وانا القستو وفصلتو وخيطتو !

جا سلم علينا ..وانا الدهشه غلبتني .

قال لي جيت شغل هنا اسبوعين. وقلت اجي ازور زوجة صحبي

ابتسمت لا إراديا وقلت ليهو..قبال أكون زوجة صحبك انا بت حيك... على العموم شرفتنا والله..

يلا طول القعده ما كان مركز معاي خالص.

ما اكضب عليكم اتغظت..اتغظت واتمليت..بالذات لمن اشوف نظرات الاعجاب في عيون البنات..

ما حسيت بنفسي الا وانا قايمه ماشه وبدون ما اقول بالأذن..

منى لحقتني وساقتني الاستراحه وقعدت تشاكل فيني : عليك الله حلفتك قولي لي بتحبيهو!!! يا جوري انتي متزوجه ملاحظة للحكاية دي !

ما عرفت اقول ليها شنو عشان كده قعدت ابكي ...

منى : عيب الكلام ده والله منك يا جوري..وأنور ما يستاهل تعملي كده فيهو..

قلت ليها يا منى انتي عارفه يمان كان بيعني لي شنو !!

منى : ويعني ؟

قلت ليها انسي خلاص انا ماشه الحمامات اغسل وشي ...

##

تلفونك مشغول 34دقيقه !!! بتتكلمي مع منو انتي !!!

يمان انت ما تخليك كده كمان !! كنت بتكلم مع صحباتي فيها حاجه !!

لالا مافيها حاجه..فيها حاجات !

اجي يا اخواني..خلاص انا آسفه

.

يمان انا آسفه

..

يعني اقفل ؟؟

كدي اقفلي عشان اجي ناطي ليك بهناك..

طيب ما انت ما عاوز تتتكلم !

اتكلم !!؟ انتي عارفاني انا بغير عليك قدر شنو يا جوري ..

خلاص حبي تاني ما حتكلم مع زول..وما حتلقي تلفوني مشغول..ولو عايز انا من بكرة حأغير شريحتي

##

يمان كان مستلقي في سريرو في الفندق وهو بتذكر الأحداث دي...دموعو نزلو في خدودو بالذات لمن اتذكرني وقت شاهين عمل لي المفاجأة د*ك وإترميت في حضنو وكنت ببكي...رمي المخده في التسريحه بغضب وقال : ما حاخليها ليك يا شاهين...ما تفرح بيها..

جوري كانت حقتي ..وحتفضل حقتي وما حيفرقنا الا الموت

لالا يمان كترها

المساء لمن كنت بتكلم مع شاهين..قال لي انو يمان في الخرطوم..ولو احتجت لي أي حاجه اطلب منو...بعدها ودعني وقفل ...

تاني يوم جاني الجامعه بعد خلصت محاضراتي...عرض علي يوديني شارع النيل وكده...قلت لي منى تمشي معاي لكن هي كانت زعلانه مني خالص ...وما ادتني جواب زاتو..

طلعنا مشينا لفييييينا ..بعد مشوار النيل عزمني غداء..

كان يوم حلو شدييييد وأحلي شي إنو نهائي ما جبنا سيرة الماضي..كان كل الموضوع عن دراستي ...وعن زحمة الخرطوم وغيرو ..

وقت رجعت السكن منى من شافتني إلتفتت على الحيطه ومثلت انها بتتكلم مع حسام خطيبها ..

طنشتها ومشيت استحميت ..جيت قلت ليها منى.. ممكن تلفي لي شعري؟؟

اول ما ردت...تاني كررت السؤال.

حتي قالت لي جيبي المشط والزيت..

لفت لي شعري وما اتكلمت معاي ولا بكلمه ...بعد خلصت جيت قعدت جمبها وقلت : يييييييك!! ده كلو زعل يا منى ؟

ما ردت لي ..

قلت ليها رأيك شنو انو شاهين هو الطلب منو كده ؟؟؟

عاينت لي بزهول وقالت : طبيعي يطلب منو كده ياا صحبتي..لسبب واحد انو ما عارف يمان كان خطيبك بالزمنات !! يا جوري ناويه تكلمي زوجك متين ؟؟؟

قلت ليها بس ما اسي .. في الوقت المناسب حأكلمو..

قالت لي ااااي كلميهو لمن الفاس تقع في الراس..وقتها حتفقدي شاهين ..وزينة ..ويمان زاتو حتفقديهو زي ماا فقدتيهو مرتين قبل كده !

يا جوري اعملي حسابك...انا صحبتك وعاوزه مصلحتك...ما تخربي حياتك بي يدك ياجوري!!.

قالت كلامها ده وقامت من جمبي .

اووف...يلا الصف?

اتوالت اتصالاتنا...اتصالات عاديه مدتها دقيقه و34ثانيه بس...

كان بسألني من أحوالي وكده...ونهائي ما كان بجيب لي سيرة عن إرتباطي بي شاهين..

وكان بالمقابل شاهين ما شغال بي الشغله..عادي ممكن يمر يوم كامل ما اسمع صوتو...ولمن يتصل علي بتلكم معاي كلام عادي وغالبا المكالمه بتنتهي بي : كدي اقفلي اسي برجع ليك.وبي وشو

ما كنت زعلانه من إهمال شاهين لي...لأنو اهتمام يمان غطى الأهمال ده

او يمكن لأنو انا ما بحب شاهين...عشان كده إهمالو لي ما فرق معاي.

*

نهاية الاسبوع سجلت خروج قلت امش بعد المحاضرات لي ناس خالتي .بعد كملت قعدت مع صحباتي شويه ومع طلعتي عربية يمان وقفت قدامي.

نزل وسلم علي وكان بسألني من أحوالي وكده...في الآخير قال لي اركبي اوصلك..

ركبت معاو وكان مشغل أغاني طول الطريق...قلت ليهو ماشه ن ..

قاطعني : بيت ناس مهاب...اي عارفو

احترت طبعا عرف من وين...وهو عرفني احترت وما كلف نفسو يقول لي واكتفى بي مواصلة الاغنيه مع احمد الصادق : لو جافيتني وغيابك طوووول...برضو الاووول ...يا حبيبي اناا..ما بتتحول من قلبي هناا

وصلنا البيت وقدر ما دقيت ماف زول فتح...اتصلت علي مها قالت لي طلعو زيارة لي أهل ابوها وللمغرب كده بجو ..عرضت علي امشي بيت جيرانهم لغاية يجو بس انا قلت ليها بتصرف

فكرت ارجع الداخليه ولحسن حظي يمان كان واقف...فاا تاني ركبت واتحركنا..

الزمن كان العصريه كده..قال لي رأيك شنو نمشو شارع النيل ؟؟

سكت مسسسسافه..الصراحه كده ختيت لي كلام مني ألف إعتبار..

قال لي بلاها لو ما ماشه..

قلت ليهو لالالا ما كده...بس ما حبيت أعطلك..

قال لي ماف اي عطل...بس لازم ادخل السوق اول ...مشينا السوق ونزل إشتري كم حاجه كده...ودخل السوبر ماركت اشتري ليهو كم غرض...

واتحركنا...المغرب قرب يأذن وانا المشيه أبيتها كلو كلو...قلت ليهو وديني ناس خالتي وخليهو شارع النيل مره تانيه..

قال لي انتي خايفه مني ولا حاجه!؟؟؟

قلت ليهو انا ما بخاف إلا من ربي .

قال لي انا زاتي ما بخاف إلا من ربي. .عشان كده خليك ساكته

وصلنا

وكان في عبارات جمب الشاطئ.شيلني كيسين وهو شال الباقي وقال لي وراي

مشينا ركبنا في واحده من العبارات...كان في ولد اظن بنضف فيها ..وقت شافنا جا شال الاكياس مني دخلهم جوه وجا طالع..ابتسم لينا ومشى

قلت ليهو ممكن افهم الحاصل شنو؟؟؟

قال لي ولا شئ...بس عازمك عشاء

قلت ليهو بس ده ما مطعم..

ضحك وقال لي عازمك عشاء من يديني

طوالي ضحكت لأنو هو ما بعرف يسلق بيضه...قال لي عارفك ضحكتي ليي...وانا ما حأرد ليك إلا بعد تضوقيهو

قلت ليهو اها عشاك شنو طيب؟؟

قال لي اندومي

ضحكت وقلت ليهو طيب

اليخت من جوه جميل ومرتب...في طاولة عشاء فيها كرسيين مطلات ع النيل...اما جوه في مطبخ صغنون وشكل غرفة جلوس كده في كنبه وكرسيين..

طلعنا الحاجات من الاكياس ..وكان عبارة عن سمك وسلطه و بطاطس

قال لي انتي قطعي السلطه والبطاطس قطعيهو لي شرايح

طيب انا كده عملت نص الأكل !!!

قال لي سرعه سرعه عشان ما تتأخري

نضفت السلطه وقطعت ليهو البطاطس وهو لسع بقشر في التوم

بعد تميت مسكت منو التوم وهو قطع السمك شرائح...بعدها تبلناهو..

اخد ربع ساعه كده ختيت الطوة في النار وكبيت الزيت...

قال لي بعد ده التحمير حقي انا..انتي جهزي السفرة

وقت طلعت بره لقيت المغرب لمن مشى ..جهزت الطاوله وختيت صحنين...

وجبت صحن السلطه والبطاطس وجبت مشروبات غازية..

بعد شويه جا جايب السمك.. كان اسود غايتو اظن حرقو الخايب

اتعشينا وكنا مبسوطين...لغاية حصلت الكارثه

#صف_البنزين?

خاينه الخاينه انا حأقتلها !

سيد امجد هدئ نفسك انت بتحلم !!

الخاينه خانتو يا خال !!! لييي بتعمل كده هي !!! هو قصر معاها في شنو عشان تخونو

الخال حضن امجد عليهو وقال ليهو : عمرو الحق ما حيضيع ..ما حيضيع !

يمان : شامة الانا شاميهو انتي !

شمشمت وفعلا ..ريحة حريق جرينا علي المطبخ ولقيناهو ملهلب !

يمان : ناوليني طفاية الحريق سريع !

ناولتها ليهو وسرعة سرعة طفئ النار !

قلت ليهو بالجد كده خليت البتجاز مفتوح وجمبو قطعة القماش دي !

قال لي والله قايل نفسي طفيتو الحمد لله جات سليمه

تلفوني ضرب لقيتها دي مها...قلت ليهو الزمن فات خلينا نرجع بعد ده..

قال لي ياريت .بس شكلو البنزين خالص

كييف يعني خالص وانت كيف تطلع بي يخت وما متأكد من البنزين اللفيهو !

قال لي ما تخافي ..كلمت عمر وقال نص ساعه وحيكون معانا ..

زعلني شديد ياخ عشان كده طلعت بره و وقفت اعاين في المويه.

جا وقف جمبي وقال لي أسف..

قلت ليهو ما مشكله..بس ما تتكرر !

قال لي : جوري. ..ليي اتزوجتيهو !

عاينت ليهو بأستغراب...ورديت ليهو بثقه : لأني بحبو

صرخ في وشي كضابه ! ما بتحبيهو وعمرك ما حبيتيهو ! عملتي كده عشان تتسدي حقك وتغيظيني !! احب ابشششرك يا مدام شاهين انك نجحتي !! انتي دمرتيني !!

ضحكت طوالي وقلت ليهو ع اساس انك ما دمرتني يعني !!!. انت ما وقفت معاي في وفاة امي وابوي !!!وبعد ده اتهمتني !!

مسكني من يدي قووي وقال لي : اي اتهمتك !!! لاني وقت جيت اشوفك قلتي لي آلاء ما عاوزه تشوفي زول !!! امشي الكافتيريا واجي القاك في حضن ود خالتك !!!!

كضاب ! انا ما قلت كده !

يمان : اي عارف...عارف انك ما قلتي كده...عارف الأنا شفتو كان شي عادي...لانو الآء هي الخططت لي ده كلو..وقدرت تخرب بيناتنا !! وانتي الغ*يه صدقتي !!

مسكت راسي وقعدت وقلت ليهو كفايه !!!كفايه يا يمان !!!

قعد جمبي وقال لي : آخر مره وانا ماش عليكم عملت حادث...اسبوع كامل فاقد الوعي !!! وانتي ولا علي بالك عرسسسسستي

عاينت ليهو وقلت : والله ما كان عندي اي خبر !! انا جاتني رساله منك بتقول اني لو عندي كرامة ما كان رجعت ليك !!

يمان : شفتي!؟؟ ياهو عدم ثقتك الوصلنا لي ده كلو !!

ودي قسمتنا والرضى بالمقسوم عباده

يمان : انا ما بخليك ليهو...وقسمآ زول فينا حيموت يا جوري ! ياهو يا انا ...وانتي الحتحددي الزول ده !!

يما...

سكتني وقتها .اتفكيت منو وكفتو كف...: كييف بتتجرأ تعمل كده !!

ما اشتغل بي وحضني ...كنت بحاول اتفك منو بس ما قدرت...كان بقول لي انا بحبك يا جوري !! والله بحبك ياجوري !

ما قدرت اتفك منو و الله العظيم ما قدرت

***

لمن نغلط ما مشكله..ما كل زول بغلط..

..لمن نعرف روحنا غلطانين ونعترف بغلطنا برضو ما مشكله...لأنو الاعتراف بالذنب فضيله ❤

لكن المشكله انو نغلط...ونعرف روحنا غلطانين...وما نعترف بغلطنا...ونداوم علي الغلط وقتها ده يبقى كلام تاني..

كونو بخير .. وحافظو علي الصف?

سبحان الله..طبعا انا امتحنت شهاده سودانيه...ولو قلت احسب ليكم عدد المرات القريت فيها الآيات الكريمة ما حأقدر ( وَالَّذِينَ يَرْمُونَ أَزْوَاجَهُمْ وَلَمْ يَكُن لَّهُم ْشُهَدَاء إِلاَّ أَنفُسُهُمْ فَشَهَادَةُ أَحَدِهِمْ أَرْبَعُ شَهَادَاتٍ بِاللَّهِ إِنَّهُ لَمِنَ الصَّادِقِينَ{7.}وَالْخَامِسَةُ أَنَّ لَعْنَتَ اللَّهِ عَلَيْهِ إِن كَانَ مِنَ الْكَاذِبِينَ{8. } وَيَدْرَأُ عَنْهَا الْعَذَابَ أَنْ تَشْهَدَ أَرْبَعَ شَهَادَاتٍ بِاللَّهِ إِنَّهُ لَمِنَ الْكَاذِبِين{َ9 }.وَالْخَامِسَةَ أَنَّ غَضَبَ اللَّهِ عَلَيْهَا إِن كَانَ مِنَ الصَّادِقِين

صدق الله العظيم )من سورة النور ...

لكن في كل مرة كنت بقرا فيها الآية دي ...ما كنت متوقعه انو في يوم من الأيام ممكن اللقب ده يطلق علي بضم الياء

يمان سافر...وانا قفلت تلفوني واتحججت بالقرايه..لأنو كل ما كنت بتكلم مع شاهين ببكي...لغاية قلق وقال إلا يجي يشوف الحاصل .

كلامي بقي قليل.. ونحفت زياده عن اللزوم.

ما بنوم نهائي..ولو جاني النوم بتخلع طول الليل .

منى قدر ما حاولت تفهم الحاصل ما عرفت...او بالاصح كده هي عارفه بس عاوزه تتأكد مني..

جات الناقصه الامتحانات...وقت اقرا بشوف الشيت آيات من سورة النور...عشان كده بقفلو وبسرح..

في الامتحانات ما معروف زاتو الدكتور جاب شنو وانا كتبت شنو..المهم حبر جف علي ورق

آخر امتحان لي ومع طلعتي في بت صغيرة اتشعبطت في رجولي!! عاينت لقيتها زينة

زيينة !! ماما جوري خاينه يا زينة!! ماما جوري ما بتستاهل الحب ده منك ومن ابوك

دموعي نزلو علي راسها رفعت عيونها وعاينت لي...اااخ من نظرتها ! اااخ كييييف انا حأقدر اعيش معاكم تاني !!!

شلتها وكنت ببوس فيها لغاية عيوني وقعو في عيون شاهين....كان مبسوط ومتفاجئ في نفس اللحظة .سلم علي وقال لي حمد الله علي السلامه

الله يسلمك..وحمد الله علي سلامتكم

شاهين : تسلمي لينا ..

نزلنا في فندق وكان مفترض نسافر الصباح ...

اتعشينا تحت في المطعم الملحق بالفندق ...كلامنا كان عادي لغاية قال لي : متواصله مع يمان!؟؟؟

هنا رجفت والعصير اتكشح فيني..لغاية الناس انتبهو..قال لي يا ساتر "!

و واصل : يعنى ما عندك اخبارو !!؟

...قلت ليهو وانا بتمتم : اخبارو !! لالالا ابدا ..و البخليني اتواصل معاهو شنو !!!

قال لي والحزن باين في وشو : اتلمو عليهو حراميه وطعنوهو بالسكين ..وسرقو عربيتو

طبعا كأنو السكينه اتغرست فيني انا !!! حاولت اخفي اللهفه اللفي عيوني بس ما قدرت...خفت يقول لي مات واتفضح !!!

لا حولا ولا قوة إلا بالله !! حالتو كيف اسي !!!

قال لي كويس ...بس الحراميه ما لقوهم...

قمت طوالي وقلت ليهو انا ماشه اغير ...

حمدت ربي لانو العصير اتكشح فيني... رجعت الغرفه ودخلت الحمام قعدت ابكي واتساءل ياربي حالتو كيف اسي !!!!

طلعت من الحمام ورسلت مسج لي شاهين اني ما حأقدر اجي تاني ..ونمت طوالي

الصباح قدر ما حاولنا مع منى تسافر معانا رفضت بحجه انها حتقعد كمان يومين لأنو عندها مشيه للسوق...انا عارفه انها بتتهرب مني ما اكتر واتحججت بالسوق ساي ..

#سابقا

امي...وين انتي !!

امي ما جات من السوق يا أمجد...

ما جات؟؟؟

اي ما جات...من طلعت الصباح ديك...

طيب انت أكلت !؟؟

لالا قلت استناك لغاية تجي...

طيب تعال شوف جبت ليك شنو...

جبت لي شنو يا امجد !!!

انت بس اجري...

جبنه مضفرة !!" يا سلام! انا بحبها !!!

يلا أكل قدر ما عايز...دي كلها حقتك انت بس ...

امجد.. في زول في الباب يا امجد

طيب انت أكل وانا بشوف ده منو...

وقت فتح الباب لقاهو ده راجل امو ..

وكان سكران كالعاده...طوالي لزاهو : زززيييييح من قدامييي !! خخخلق تتستاهل الطلق !

وقت شاف اخوهو الصغير بياكل في الجبنة جا قلعها منو ولزاهو...: ت ت تااكل ال السمممم !! وطوالي بدا ياكلها بنهم كأنو ليهو سنييين ما ماكل حاجه !! اتجاهل نظرات الكره من عيون امجد ونظرات الحزن علي الجبنة من عيون اخوهو الصغير

#الآن

وصلنا القضارف ...يااخ بالجد كده اشتقت ليها ...شوق ما عادي جوها ...شجرها...ناسها "!! اي حاجه فيها ¡¡

نزلنا في بيتنا لأني كنت مشتاقه ليهم بالجد ...شاهين قعد معانا شوية و

طلع قال عندو شغل...

طوالي جاتني صبا تشمر لي عن يمان...وانو تعبان وحالتو خطيرة

وألاء وقت فسخ خطوبتو منها حاولت تنتحر بس حصلوها..و و وكلام كتيييير غايتو

ما اشتغلت بيها وقضيت زمني مع العيال...نص النهار كده نومت زينة وجمان...ما عارفه بس ما قدرت أسيطر علي نفسي وطوالي اتصلت علي يمان....لكن سبحان الله...ولأنو ربنا عاوز يكشفني مجرد ما اتصلت رد علي آخر زول ممكن اتوقعو...تتوقعوهو منو!!

لالالا نهائي ما حأقول...اقيفو في الصف??

.