صف البنزين

الفصل الرابع

شفت محمد سيد البقاله مكبل وفي عربية شرطه الناس كانو ملمومين قدام الدكان وفي ناس بصورو كمان

قلعت عيوني وشهقته في شنو يا صبا ده شنو مالو محمد قابضنو

صبا:هششش يا بت اسكتي خليني اشوف الحاصل

قلت ليها بهمس: طيب في شنو مالهم قابضنو

قالت لي ضبطو عندو كمية كبيرة من البنقو طوالي دموعي جو نازلات حنيت عليهو بالرغم من مواقفو الما سمحة معاي و بالذات لمن شفت منظر مرتو واطفالو الصغار وهم بيبكو وشايفين سندهم الشرطة معتقلاهو .

جريت غرفتي ودموعي ديل عشرة عشرة. وكنت بتن*د ساي

شلت التلفون وقتيآ ومشيت الارقام بس م لقيتو اي صح م انا مسحتو من قبل 3سنه وبالرغم من انو رقمو كنت حافظاهو عن ظهر قلب لكن نسيتو.. ما اسهل ان ينسى المرء

جاتني فكرة بريدي حق الرسايل ما كنت بحذفو فجريت على البريد ولحسن حظي لقيت رقمو قاعد ولقيت محادثه قديمة بيناتناا. كنت فيها غ*ية شديد مرسلة ليهو

انا : حياتي بحبك

يمان : عمرر حياتك وروح حبك انا بعشششقك ياخ وبموت فيكي

انا : صباحك شهد

يمان : ما شهد صباحي جوري.

انا : شهد دي بتنا المستقبليه ولا نسيت يا قلبي

بالجد كنت في قمة الخذلان، كونو انا أحفظ عهدو، وأصون ودَو كان شي مرهق جداً بالنسبة لي وأدايماً بذكر نفسي بأنني يجب أن أراعي ما بيني وبينك، وفجأة يضيع في لحظةٍ كل شيء.ياما تجرعت مرارة الحرمان والغربة بسببك اخترت امش اقرا بعيد عشان اتفادى شوفتك واتفادى نظرات الناس لي المليانه شفقة وشماته وكأنما تكوّنت روحي واتشكلت عشان تنسجم مع بيئتك وقسوتها نا عرفت مرحلة النضج لانو، الظروف خلتني أحرق المراحل التي تفصل بين الطفولة والنضج، رميت طفولتي جانباً وأتقمصت صورة المرأة في سن مبكرة وبالتالي السنين طبعت بصمتها على ملامح وشي بصورة كئيبة جداً . ما بين ص*ري والمقابر، علاقات بالاسم والمعنى ودفن الضحية، الفرق بأنّ المقبرة تدفن أموات، وأنا دفنت أشياء بالص*ر لازالت على قيد الحياة . انت عارف يا يمان قمة الخذلان أنو أعلمك أول دروس الوفاء، وبالمقابل انت تدرسني أقسى دروس الغدر، أن أوفيك كل حقوق العشق، وانت تسلبني كل حقوقي الإنسانية لأدور حول نفسي في حلقة مفرغة لا ادري اين أطرافها ، أبحث عن الأسباب والمسببات. أحتاج إلى الهدوء جداً، ففي داخلي ضجيج مدينة من الحنين، وفي قلبي أشلاء حكاية ممزقة، وفي عيني ملح بكاء ألف ليلة وليلة. انت عارف قمة الخذلان لمن كنت بحكي ليك عن غدر الأحبة، وسبحانك ربي كنت أنت أول الغادرين في سجل عمري، الخذلان اني أحكي ليك عن خيبات العشاق، فأصاب من بأكبرالخيبات في جل حياتي، الخذلان ان أشكو لكِ ظلم المقربين، فتكوني

أنتِ سيد الظالمين لقلبي، فبعد هذا لمن أشكو جورك وظلمك قمة الخذلان أن أُسكنك في عيني ، فتصيبني بالرمد وتذهب بعيداً ، أن أسكنك روحي فتحرقها بلهيب جحودك وحقدك واراك ترحل بعيداً، أن أسكنك قلبي فتركل القلب بكل قسوة وتمضي، عايزه أسألك سوال واحد بس اتعلمت القسوة دي نن وين انت؟؟؟

طلعته من الرسائل ودورتها بكا بكييييييت لغاية ارتحت

وتاني شلت التلفون واتصلته.

يييييييك حسيت كأنو تلفوني قال لي : هو الزول ده لسه عايش؟

بعد شويه الخط فصل.

ااتذكرت وقت كنت بتصل عليهو كان بفصل الخط وبرجع لي وفعلآ رجع لي قلت الو .

رد لي بصوت كلو شوق : جووري

ومن عادتي قربت اقول ليهو عيون جوري .قلب جوري نبض جوري.

بس مسكته نفسي وقلت ليهو وانا بتنفس بصعوبه : محمد انت ليك يد في اعتقالو؟

قال لي شنو! انت بتقولي ف شنو محمد منو!

قلت ليهو يمان م تلف وتدور الراجل صاح غلط معاي بس ما لدرجة انك تخت ليهو بنقو في بقالتو ي يمان عندو اطفال صغار !

يمان : جوري انتي جنيتي ! انتي بتقولي في شنو انا ما فاهمك !

قلت ليهو امس وقت لاقيناك انا وصبا كنت متوتر ومرتبك الجابك حينا شنو يا يمان ؟

هنا فاجآني لمن قال : جيت عشان اشوفك وابل شوقي بصوتك

بتذكر نصيحة حبوبتي ربنا يرحمها لي كأنها قبل شويه نصحتني قالت لي ما تسمحي للخذلان يتسرب ليك ابدا ما تدي فرصه اوعك يا جويرية تملي يدك بي زول ، وأوصتني أني ما اعتمد على زول ، وأنو ما اتأمل على الفاضي امد كراعي قدر لحافي

عشان كده نهائي ما فكرت اصدق الكلام القالو يمان .انا قدر ما حاولت احتفظ بالود الكان بيناتنا بتذكر العملو طوالي ب**ر الحنك ، بتديهم الثقه لكنهم يتسربون منها ويتساقطون، كقطرات الماء كحبات المطر، نحاول اننا نجمعها ولكن ما بنستطيع، نحاول اننا نلتقطها لكن سرعان ما بنفشل.

الثقه لو اتفقدت صعب انها ترجع يا جماعه.. لن أنسى من كان بجانبي عندما احتجته، ولن أنسَ من تخلّى عني وخذلني، ففي الحالتين هناك بصمة لن تُنس أبداً.. وقت فقدت امي وابري يمان ما كان معاي ولا دعمني باي شكب من الاشكال لكن كان زي المصارعين اداني الضربة القاضية واتغلب علي وانا اصلا في حالة يرثى لها. كانو كان راجي لحظة ضعفي دي بالضبط عشان ينفذ عملتو.

قمة الخذلان أني اد*ك الثقة فتضيعيها، أني أنشد في ظلك الأمان فتسلبني مني أماني وإستقراري وهدوئي ، وتخليني هائمة على وشي وقد فقدت ثقتي بيك وفقدت ثقتي بنفسي وبكل الناس الحواليني ، ياتو خذلان ده الخلاني اسقط بالطريقه دي؟ انت عارف يا يمان خذلانك بقى لباسي ووسادتي وغطائي. انا خسرت كل حاجة سمحه كانت عندي ، وخلاص شايفه انو خسارة اني احلم باي حاجة حلوة تاني لاني ببساطة حافقدها زي ما فقدت غيرها كتير ، الهدوء هو اخر حاجة انا عايزها عايزه اكون في سلام داخلي في فترة نقاهة ونقاء روح بعد ما فقدت اي شي . لو كان الفراق هو الحاجة الانت عايز تصل ليها وتكون ليك ضوء في رخر النفق يبقي لك مت اردت، نفّذه واوعك من التتردّد، اجلدني بسياط بكل قوتك، فلن يكون سياط الفراق، أقسى من سياط الخذلان. اكتر حاجة بتالم البني آدم لمن أصحي من نومي متألمة أتحسس ظهري فإذا بطعنتك القاتلة داهل ضلوعي ، وجرحي منك ينزف وظهري مقسوم علي اتنين ، يعني ما كفايه ظلم الأيام عشان انت زاتك يا يمان تكون ضدي؟ أنت والأيام ضدي كلكم ضدي؟ هل انا حأنجو بعد ده؟ أصعب شيء أن يموت في عينيك إنسان وهو على عايش . مولم جداً أنو أكون معاك شهوراً وشهوراً وحتى سنين منتظرة بلهفة اانو سعادتي تكتمل معك ونبني بيتنا سوا نملاهو شفع حلوين بنات شبهك في كل شئ واولاد بكل رجولتك لكن ليي يحصل كده.. الحلم ده برغم من انو بسيط لكن بالنسبه لينا حاجة من سابع المستحيلات انها تحصل لييي لانو انت يا يمان ما عايز كده..نفسي افهمك.. نفسي افهم الراجل الانا قلت ليهو اول كلمة بحبك..

اتذكرت موقف حصل لي معاهو قبل ما نتخطب وده كان اول مرة نتلاقى فيهو كان عندو عرس اختو في البيت فكنت قاعده مع آلاء صحبتي وبنات اهلو بنتونس ونضحك ساي تلفوني دقه وما كنت سامعه حاجة بسبب الجوطة الشديدة فطلعت بره وكنت بتكلم مع امي فكانت بتسألني من مكان الملح وانا ما بعرف اوصف والجوطة شديدة خلاص قلت ليها يمة اشحدي من الجيران اكيد ما حترجعيني البيت بسبب افتش ليك ملح بعد قفلت منها لقيت زول واقف قدامي قال لي قبل اتكلم اول مره اشوف بت بتصوف لامها حاجات المطبخ ليي الهبش الضبط منو يعني

قلت ليهو اولاً انا الماسكة المطبخ في البيت لانو الطببخ اهم حاجة في حياتي وبحبو شديد وتانياً انت كنت بتتنصت علي ولا شنو؟

ضحك وقال لي شبهك ديل بطبخو اسي وبغض النظر عن تانياً سبحانه من خلقك انتي بت منو؟

حيرني زاتو وما رديت عليهو رجعت جوه لناس آلاء قلت ليها لاقيت ود اهلكم مجنون وما طبيعي قالت لي ده ياتو كمان وقبل ارد ليها سمعت صوت زول قال معاك المجنون الما طبيعي يا ألوية عرفتيني

آلاء ضحكت وقالت ده يمان ود خالتي زول هدي ورضي مالك تقولي عليهو مجنون الما طبيعي هههه..

دي كانت اول مرة الاقي فيها يمان.. بجد كان المجنون الما طبيعي وحيفضل في نظري كده الي ان تقوم الساعه.

لمن الظروف سمحت وادتني كل السعادة دي على شكل راجل وفي الرجال سوداني وكان هو اجدر راجل يفوز بقلبي وحبي وثقتي . لكن ان**رت كأس الثقه بقبضة قسوتو ، وادفقت كل الأحلام وبلل ماء الأماني أرض الواقع القاحلة، فهل انت حتقدر تجمع ماء الثقه ده تاني؟ اجمعه الآن إن استطعت. الكآبة تجثم على ص*ري بقسوة ولا أستطيع النهوض من هذا الكابوس المزعج والحزن يسترخي في ممرات روحي لا أستطيع التنفس كمريضة بالجيوب الانفية ، والليل يرسم لشحوبته ألف وطن تبدأ حدودها من عيناي وتختتم سفرها صوب عينيك ليستقبلها شعاعك مرحباً

اتاخر الزمن وكنت لازم ارجع بيتنا وزي ما بحصل في الأفلام والقصص والروايات والمسلسلات انو البطلة يرجعها بيتهم البطل وهو نفس الشخص الاتشاكلت معاهو عشان يقعو في قصة حب تتخللها المشاكل ويفوز الحب في النهايه..

يمان كان بطلي الحيوصلني البيت وكنا طول الطريق بنتناقر واكتشفت انو ما زي الأبطال البكون حنكهم سنين ديلك كان لئيم وباين عليهو انو شخصية متسلطة مغرورة وكعادة قوانين الحب كنت لازم اقع في حب الشخصية المتسلطة والمغروة دي وهذا ما حدث..

امي كانت منتظراني برة.. امي زولة بتخاف علي شديد لانو من مشيت بيت العرس متصلة علي 34مرة وكلها بتسألني عن حاجات م مهمة وبالجد ما عارفه لو انا مته قبالها كان حيحصل ليها شنو.. ربنا يرحمها كانت ولا زالت ملاكي الحارس في كل خطوة انا بخطوها كنت مطمنه انو في حارس وراي اسمو امي..

امي اصرت على يمان يدخل يشرب كباية جبنه وكانت عاملة كيك قالت الا يضوقو..

وقعدنا كلنا انا وامي وابوي وخالد يمان وصبا شربنا قهوتنا وقتها امي وابوي جابو سيرة انهم السنه دي ناوين يحجو وكان فاصلنا عن موسم الحج 9 شهور بالضبط

**

يتحدثون عنهم في غيابهم، يستلذون بطعم لحومهم الميتة، يمضغون ولا يبالون، فحتى الأموات لم يسلموا من طعنة الغدر فماذا عن الأحياء؟؟ حاره لمن تكتب وتكتب وتكتب عن زول يجي يجمع حروفك ويزخرفها وييزينها ويهديها لانثى غيرك وبعد ده يتفاخر قدامك بانو انتي سيدة العشاق بالنسبة ليهو. حاره لمن تكوني عارفه انو ده كذب في كذب وحتصيبك موجه من الإحباط و يعصف بيك من كل جانب. عشان كده الأفضل الواحد يحتفظ بأحلامو الجميلة تحت وسادتو، ويمارسها كل ليلة بينو وبين نفسو بدون ما كد يسرقها ويهديها لزول تاني ، مفترض ما نضيع عمرنا في صنع أجنحة تطير بينا لزول ما بستحق ، لانو اول حاجة حيعملوها لمن تصل إليهم اولا بقصو أجنحتك وب**روك علناً قدام كل الناس حاره لمن أدخرعمري كلو ليك وأغلف قلبي لأهديه إليك، وأصون عواطفي من الصدأ والتآكل، لأبقى دائماً على أهبة الاستعداد ليك انت وأنتظرعمرك أنو يشاركني باقي العمر، فتاتي أخرى وانت تديها عمرك بكل الرضا ، وتستولي عليك بي كلو وتاخد مكاني ، ولساني يقول قد كنت ولكنك الآن لست مهم لدي

**

حرفياً لو كان امي وابوي حيعرفو عملتك ما كانو وافقو انو يربطوني بيك بي دبلة رخيصة لبسها بيعني ارتباط كبير بين اسرتين..

اتخبطت بعد شهر من معرفتي بيهو وبعد تسعه شهور امي وابوي سافرو الحج ومنها بدت معاناتي

حرفياً انا من اليوم داك ما شفت سعادة ولا عشتها وبس عايشة بتنفس وما بهمني حاجة في الدنيا دي.

ندمانه؟ ما عارفة والله ندمانه ولا لا على الارتباط ده. انا ما عايزة اكون جاحدة ما بنكر عشت لحظات جميلة جدا مع يمان حتى لو كانت كذب. لكن م بنكر انو اداني احساس اني ملكة في مملكتو.. ما بخل علي باني احس الاحساس ده ابداً ودي احلى حاجة قدمها لي يمان.

الخذلان حاجة مُؤلمة جداً حين يشبعنا حد الوجع، حد الانتهاء من كل شيء لا نحتاج إلا أن نسمع له، نسمع صوت ذلك الذي سبب حُقنة الألم داخلنا، صوته ما زال يَدوي لأنك لن تنسي ومن المستحيل انك تنسى من تحب لمن تدي إنسان القدرة على انو ي**ر قلبك يدوس على كرامتك ، وتكون واثق بي انو م حيعملها ولا حيتجرأ ويجي يوم ويفعلها حينها يصبح وحينها فقط يفعلها احاره لمن اتوجك على عرش قلبي أمير، وأنصبك على روحي ملك ، وأتحدث عنكِ بإنبهار فتبهرني وتفاجئني بأنو في واحدة تانية ، قد جلست على عرش قلبك، أخذت مكاني وكل صلاحياتي وسرقت مني انبهاري بيك . مؤلم والله أنو تتلقّى الطعنات من زول سكنتو تجاويف قلبك، إنسان أنت حبيتو بإخلاص، ووثقت بيهَ ووهبتو الحب والمشاعر الصادقة ، انسان بنيت معه أحلاماك الجميلة ووعودك متواضعة، عندما جعلته فوق كل شيء، حلقت بك عالياً ولكن فقدك توازنك ورماك في اقبح مكان في العالم كنت بنتظرك مع إشراقة كل صباح، ووبنتظر طلتك مع طلة كل قمر لكن خذلتني ودمرتني ، وضعت وضاع عمري معاك حسبي الله ونعم فيك يا يمان كرهتك لكن انا بغش منو… لو اسي جيت وشفت نظره الحب في عيونك حاقول ليك يمان انا بحبك وعمري ما نسيتك هل انت شفت عدم كرامة زي ده؟؟

وبعد العملو ده كلو جاي يقول لي عشان اشوفك.. ههههه قال كده بسبب واحد هَ عارف نقطة ضعفي كويس.. عارف انو هو نقطة ضعفي عشان كده يختفي على كيفو.. يوجعني.. يخذلني.. بعمل ده كلو لانو هو نقطة ضعف بالنسبه لي.. عارف انو مهما عمل لي انا حاسامحاو… بكرهك يا يمان بنفس مقدار حبي ليك وما اظن الكفة دي تترجح تاني

لأصبح في غمضة عين هباءً منثوراً. مولم جداً أنو أحدثك عن أحلامي وطموحاتي الانت بتمثل جزء كبير منها ، وحاجات كثيرة عايزاها تتحقّق لي وانا معاك وجمبك ولكن وفي لحظة جنونية دائمة منك تسرق مني أحلامي وطموحاتي وتديها لانثى تانية غيري ،انتشرت عدوى اليأس في جميع مفاصلي، وتمدد الصمت في مساحات حنجرتي وانزويت بعيداً في ركن قصي انطوي على نفسي اتقلص يصغر حجمي ولم تعد لدي قوة لاواجه بها شماتة العالم ولا شفقتهم ، تتقاسمني أوراقي ومعاطس أقلامي وريشة وتري ولا تقاسمني المي؟؟ لماذا هذا الظلم يمان؟ انا مش كنت في يوم من الايام حبيبتك؟ حبيبتك الكنت بتغير عليها من النسمة الكنت بتموت الف موتة لو شفت دموعها ساي اسي دموغي بقت ليك كبنزين مهم انك تتحرك بيهو وتتنقل من بت للتانيه..

والان**ار سيّد المشهد، وفي داخلي دمعة مكبلة منذ سنين، أسمعها في داخلي تتدحرج وتقف في مفترق أنفاسي ولاتخرج كعبرات عشان تريح قلبي واقدر اتنفس الصعداء. حتي الهوء تحالف معك وخانني . ‎بمر الإنسان بلحظات صعبه ما عندو اي دخل بيها أمور ابداً ما بقدر عليه فهمها ‎تُسبّب له نوعـاً من الإحباط المفاجئ ويتذمّر من الحياة وحظو التعيس كانو هو العملو وبكون عايش في مُكعّب كوّنته أفكاره السوداء، و شكّلته تطلعاته، ‎فيظل فيه مِحبوساً لا يتقدم ولا يتأخّر متقوقع في دائرة افكاره ، لا يتكلّم ولا يحلم بس زول عايش بدون هدف في الحياة دي الأمور دي كلها ظلّت صَعبة على العامة انهم يعوها ويفهمومها . ونرجع نقول ما كُل خذلان ممكن انك تحكيهو لانو مخجل جداً انك تحكيهو للناس يا اما بسبب انك ما عايز زول يشفق عليك او بسبب انك ماا عايز يضحكو فيك لانو غباد منك تتخت في موقف محرج زي ده . بعاين للايام فيلوّح لليأس ألف افق فانطوي على نفسي خوفاً من ان يصيبني سهام اليأس ، وارجع تاني لوحدتي والبرد يتوغّل في أوردتي وشراييني حيجي يوم واغادر فيهو حزني ما معروف اليوم ده متين لكن واثقه من انو حيجي رجلاً ام عاجلاً ، ماف محال لصداقة من اي نوع.. ماف صداقة بين بت وولد .. يمان ما دخل لي بحنك صداقه كان جادي ان عايزني كحبيبة ورفيقة وزوجة لكن ما حصل ده كلو. لا أصبحت رفيقتو لا صديقتو ولا رست مرساتي في شاطئو كزوجة …

جوري.. قولي حاجة حتسكتي كده لمتين؟

سكتته م عرفته اقول ليهو شنو

قال لي جوري انا لسه بحبك ولو عاوزه انا ممكن من اسي ألغي زواجي من الآء انتي عارفه انا لا بحبها ولا عايزها والظروف هي الحكمت بالعلاقة دي.. انا بحبك انتي بس وغيرك ما عايز نهائي

بالرغم من كلامو الصادم الغير متوقع ده قلت ليهو بثبات : لو جبت شافع عمرو شهرين م حيصدق كلامك يا اول فائز بجائزة نوبل في الكذب والخذلان.. انا بكرهك والله كره ما كرهو زول لي زول.. متوقع مني يعني ارضى بيك بعد كل الانت عملتو؟ انت حقيقي يا يمان؟

جوووري. بحبك انتي وبس يا جوري وزواجي من آلاء كان لاني كنت فاقد الامل منك لكن انا ولا يوم ما نسيتك طيلة التلاته سنين دي م نسيتك

لوهلة كنت حاصدقو والله لكن هو كان رقمي عندو ليي ما جرب يتصل علي؟ يمان كان بعرف انا بقرا وين ليي ما حصل مره جاني في الجامعه وحاول يصالحني؛ رجعتو وكلامو ده ان دلو بدلو على حاجة واحدة بس يمان رجع عشان شافني مع شاهين غير كذا ما كان حيدق في نمرتي زاتو يمان بعرفو كويس هو من النوع الما برحم وما بخلي رحمة ربنا تنزل وقبل ما اضعف

قلت ليهو بحزم : يمان م تغير الموضوع وتتصرف الليله قبل بكرة لازم محمد ينوم مع اطفالو وقفلت الخط في وشو

وقعدت ابكي تاني

***

كعادته ؛كان يجلس في غرفته المظلمه حالكة السواد تماماً كالالم الذي يعتصر قلبه وعندما أطل من باب الغرفه خادمه ويده اليمنى وقال بصوتة الخشن

: تمت المهمه وتم القبض علي محمد

أطفء سجارتة واخذ يقهقه بصوته العالي وقال له: كش ملك ده اجمل خبر يتقال لي الليلة دي. طيب اتفضل شوف شغلك

بعد خروج زائره وخادمه المطيع استلم هاتفه وراح يقلب الصور واستقر في إحدي الصور التي كانت تضم جوري ومعها رجلاً وطفله.. نظر بنظرته الثاقبة كالصقر الذي ينقض على فريسة.. همهم بكلمات غير مسموعه وكان يوعد بدمار كل من يقرب على محبوبته وسارقة لبه وعقله جوري

*

زي حوالي الساعه 3:34مساء كده صحيت من النوم مخلوعه مع اني ما متذكرة اني حلمانه حلم كعب بس سبب الخلعه شنو ما عارفة قمت استغفرته ومشيت استحميت وصليت الضهر قريت وردي من القرآن الكريم وكان الجزء 26 وقمت على المطبخ نضفتو وبديت الطباخة.. صبا كانت مافيشة ما معروف غطست وين والعيال قاعدين جعانين فعملت ليهم بيض وكان ماف عيش طلعت اجيب عيش وانا جايه من الفرن من رمر الشارع شفتها نزلت من عربية وكانت بتتلفت ساي وخايفه انا لمن جدعته كيس العيش وحسيت قلبي حيقيف والله وزعلت زعل شديد علي اخوي خالد الشقيان وتعبان النهار كلو وف الآخر ده جزاتو؟؟

رجعت البيت بمسافة لقيتها واقفه بتسأل في العيال انا وين جيت ختيت ليهم العيش وقعدت اكلت جمان ولا انتبهت ليها بتقول في شنو زاتو بس ربنا يجيب العواقب سليمه.

بعد خلصته اكلت الشفع فتحت تلفوني لقيت اتصال من يمان ومن شاهين طبعآ استغربت رجعت لي شاهين بس م كان في رد اتحيرت زاتو والله

بعدها فتحت الشبكه وقلت اتفحص الفيس شويه

لقيت رسائل كتيييرة من بينها أمير مدريد الوهمي داك

مرسل لي مشيت مدريد ولاقيت ميسي و...و.عوارة كده ما ليها اي داعي

رسلت ليهو ضحكه غايتو ضحكني برغم من عوارتو دي رد لي بعد 34ثانيه : ويييينك يا اميرة ميسي وين الحي بيك ؟؟

قلت ليهو شنو ؟

قال لي قلت رمضان كريم

قلت ليهو وانت طيب وعساك من عواده

قال لي بقولو الله أكرم يا بتي انتي عايشة وين

قلت ليهو في السودان الواحد ده حق التلتين ميل مربع

قال لي انتي في زمن التلتين ميل مربع الشي ده اتقسم زمممان

قلت ليهو بقي كم اسي

قال لي يمكن ٣مليون ميل مربع ما معروف..

بالرغم من انو ما عندو موضوع لكن كان بخفف عني شديد وب**ر لي اليوم

قال لي عايز اسالك سؤال قلت ليهو احكي لي

متزوجة مخطوبة ولا سنقل زي اخوك ده

م رديت ليهو ومشيت الطلبات قلعته عيوني وقت شوفته انور شاهين مرسل لي طلب صداقة دخلت صفحتو وشوفته العجب لاحول ولا قوة الا بالله العلي العظيم معقووووله بس !

مشتاقين والله العظيم..وتاني بعتذر ع التأخير وتاني ان شاء الله م حيكون في تأخير

يلا انتظام واقيفو ف الصف بنظام