الفصل الخامس

3402 Words

. انور شاهين مالك شركة زينة للسيارات معقققوله يا جوري الزول ده ملياردير عديل مشيت صور الصفحه ولقيت صورو وكان ياهو زاتو بشحمه ولحمه قفلت الفيس طوالي وقمت مشيت المطبخ وبالي مشغول بي شنو الله أعلم وما عارفه هل اكتشافي ده حياثر على علاقتي بيهو ولا وما عارفه نوع التاثير حيكون شنو . وانا سرحانه ومشغولة جات صبا وبدت تتكلم معاي وانا ما مركزة معاها اصلا وما سامعاها بتقول في شنو زاتو قالت لي انتي مشكلتك معاي شنو؟ قلت ليها عفوا؟ قالت لي ليك فترة متغيرة من يوم مشيتي تجيبي العيش وانتي لا بتتكلمي معاي لا بتردي لي مالك شايفه فيني شنو انتي اصلا قلت ليها صبا انا ما ناقصاك اسي اختيني ما ناقصني؟ مالك الشاغل بالك شنو احكي لي انا م مرت اخوك ضحكت ضحكة شماته ظاهر انها عارفاني اني شفتها وبتحاول انها تصاحبني عشان ما افضحها لكن حقيقي انا اسي ما فاضيه ليها واكيد ما ناسياها وحافتش وراها لغاية اعرف هي بتعمل في شنو قلت ليها : ماف حاجة يا مرت اخوي ولو في انتي اول واحدة حتعرفي ما تشيلي هم.. ابتسمت وباستني في خدي ومشت . امرها عجيب لكن بالجد م كنت فاضية ليها الساعه د*ك مرت الأيام ورمضان ودعنا خلاص كان يوم الوقفه والشغل فوق راسي لي فوق نضافة وغسيل ملابس وعدة الغريبة انو صبا كانت بتساعدني ودي اول مرة طبعاً تعمل كده واكيد انا وانتو وهي عارفين كويس هي بتعمل كده ليي.. قدرت اعرف انو الزول الكان بتلاقيهو راجل صحبتها اتخيلو بس!! يعني ما عارفة زاتو هي بتعمل كده ليي الخلاني اكتشف انو ده راجل صحبتها في مرة جيت سمعتها بتتكلم بالتلفون مع واحد وقالت ليهو هي اسي جات من عزا ابوها ولا لا.. وكانت سهر صحبتها هي الوحيدة العندهم وفاة في البيت كان حبوبتها اتوفت وسمعتها بتقول ليهو انها حتحاول تجيهو في البيت ايام العيد لانو الدنيا ما رمضان وعادي ممكن تعمل الغلط ما دام اصلا هي ما في الشهر الكريم كانو الناس مسموح ليها تعمل الغلط ده لكن على شرط ما في رمضان. بالنسبة لي بعتقد انو الإهمال عبارة عن إسم تاني للخيانه باعتقادي صبا لجأت للخيانه لأنو الاهمال والرتابة تغط على علاقتها بخالد انا ما برر خيانتها ولا بشجعها لانها اتظلمت يمكن بسبب انها مهملة.. لكن ليي ما هي التبادر بكده؟ صبا وخالد زواجهم كان عن حب ليي ما حيتذكرو الحب الكان بيناتهم ويحاولو بقدر الإمكان ينقذو ولو القليل من العلاقة دي؟ انا ما عايشة معاهم عشان اعرف الخلل من منو لكن ده ما ببرر انو تخون. دينياً واخلاقياً م المفترض صبا تلجأ للخيانه وبكده بتكون دمرت اسرتين. وصحبتها ي جماعه! الحصل شنو في الدنيا دي! لا عليكم يا أصدقائي ، فالخائن خوّان حتي لو برّر الخائن خيانته لازم تعرف أنو هناك مُشكلة في العلاقة لم يتم حلها ولا إدراكها ، أما لو ما برر الخائن خيانتو إلا بالصمت، فخليك عارف أنو العلاقة قامت على غير رضى وقناعة من الطرفين . الخيانة والطعن في الخلف بقي حاجة ساهله في حياة المتزوجين.. هي الخيانه للناس الما متزوجة كريهةة فما بالكم لمن تكون خيانه زوجية؟ يعني الناس بقت ما بتخاف من ربنا والله اعلم كان نفسي اسال صبا صحبتك دي عملت ليك شنو عشان تطعنيها الطعنه دي؟ انا اخوي يمكن شويه اخف ليهو الخيانه دي من سهر لكن سهر يبقى عليها راجلها وصحبتها؟ انا لو في مكانها بموت يا جماعه.. لكن لي م اكون في مكانها ما اما مجربة وما حصلت لي شي. صحبتي وخطيبي لكن انا اخف قدراً لانو اصلا ما كانت علاقه كاملة الخيانة ما بتجي الا مرة واحدة، ولو جينا درسنا الزول القام بيها بنلقى انو عندها الكثير من المقدمات وحتقرب تدي الزول الحق في انو قام بيها . الزول الوفي هو نفسه الزول الخائن اللسع ما اكتشف انو ممكن ي**ن . ‏في عبارة عاجباني شديد بتقول :أصدق الصِّدق الأمَانَة وأكذب الكذب الخيانة وع فكرة الخيانه ما الا تكون فعل في خيانة اسمها خيانة القلب ودي اقسي بمية مرة من خيانة الجسد ومفترض اي زول يعرف انو أسرارو يموت بيها براهو وما يشاركها مع اي زول ، نقاط ضعفك برضو لازم ما يعرفها زول غيرك.. انا نقطة ضعفي كانت يمان وللأسف هو عارف كده كويس ودي كان نقطة في صالحو.مفترض ما تخلي زول مهما كان عزيز عليك ما توريهو اسرارك واعمل بقاعده اقصو حوائجكم بالكتمان واتذكرو دائماً إن الخيانة لا تأتي إلا من شخص قريب ليك واكتر حاجة خايفه منها انو تبقى وجهة نظر على مر الازمان وقتها والله حنكون في مشكلة حقيقية… والله اعلم ** وانا بطلع كيس النفايات جمب الباب لاحظت انو بقالة محمد مفتوحه فالشمار كتلني وختيت الكيس كنت ماشه اشوف الشغال فيها منو لكن وقفت لمن سبقني محمد وقت جا طالع. ومن شافني قلع عيونو واتربش كده واتخلبط كأنو شاف ليهو عفريت طوالي رجع لي بقالتو وكان خايف خوف ما عادي..كأنو شاف عفريت بسبعه راس استغربت طبعاً لانو ما من عوايدو ما اشتغلت بيهو كتير ودخلت البيت وانا مبسوطه برجعة محمد لمرتو واولادو و كيف ما انبسط ويمان لي الآن بخت لي كلامي الف إعتبار من وقت شاكلتو داك ومشي طلعو من الحبس لكن الشي الما كنت عارفاهو انو يمان ما ليهو يد في اعتقال محمد ولا ليهو يد في الإفراج عنو.. لكن منو الليهو يد ما معروف.. خطرت في بالي فكرة اني امش اتصل عليهو عشان اشكرو. ما عارفه انا مالي كأني عايزة سبب عشان اتكلم معاهو بس.. ضغطت رقمو واتفاجات لمن لقيت نفسي متذكرة كل رقم وحافظاهو عن ظهر قلب وكالعادة فصل وبعد شوية كده رجع لي كالعاده فصل ورجع لي وقبل ما أقول ألو رد لي هو : حبيبي مشتاق ليك والله انتي م اشتقتي لي معقولة؟ ليي الجفا ده كلو منك يا جوري. كلامو أثر فيني لدرجة ! بس نهائي ما بينت ليهو كده لانو لو فعلا هو مشتاق لي كان هو البادر بي انو يتصل بارد.. مغرور وتقيل وشايف روحو وانا مفترض اكرهو بالسبب ده بس مقدار حبي ليهو قدر كرهي ليهو.. دي لعنة والله انت لعنة يا يمان الله يشفيني منها قال لي جوري معاي انتي . الوو ! قلت ليهو شكرا ليك بالجد شكراً ليك قال لي بتشكريني على شنو؟ عشان قلت ليك مشتاق ليك؟؟ جوري انتي حقيقيه؟ قلت ليهو بشكرك على العملتو لمحمد.. قال لي ياتو محمد يا جوري قلت ليهو شايفه محمد رجع بقالتو تاني يمان: محمد ؟؟؟ مين محمد! محمد سيد البقاله الأنت اتشاكلت معاهو وضربتو ..وانسجن ولا ما انت الطلعتو من السجن انت بقيت تنسي ولا بتتناسي ولا فهمك شنو يعني صعب أنو تحب زول ما بحبك وبعد ده بوهمك بي انو بحبك وأصعب حاجة انك تستمر في حبه بالرغم من انو ما حاسس بيك زمن كنت مخطوبه ليهو عادي اليوم كلو ما يتصل على ولا يعبرني ولا برساله ووقت يجي آخر اليوم يراضيني وانا كنت زي الهبله بنصاع ليهو وحالياً شاهين كذلك اي حاجة يطلبها مني بنفذ فما عارفه ليي انا زي الحمل الوديع وهل دي طيبه مني ولا صعف ولا غباء. نفسي اكون زولة حازمة عندها القدرة انو تاخد قرارتها بنفسها لكن الطبع ما بغلب التطبع فمن وانا صغيرة لمن اكون مع بنات اهلي ولمن يدقوني ما كنت بتسده حقي. بقول هم تاني ما حيلعبو معاي ودايماَ كانو بستقلوني في الحتة دي وانا زوله متسامحه جداً لأبعد الحدود لمن عوارة كونك تتعايش مع شخصية زي دي صعب جداً صعب أن ينتهي الحب الصادق بسبب حاجة تافهة والأصعب أنو يستمر الفراق بين اتنين بحبو بعض حد الجنون لأنو كل طرف ينتظر إشارة الرجوع من الطرف الآخر والأصعب جداً انو يكون الغرور هو المسيطر في العلاقة البتربطهم صعب الوداع في الحب والأصعب أن ينتهي الحب بدون حتي كلمة وداع.. لمن تسمع من الناس انو حبيبك قرر يخليك ليي تسمع من الناس حاجة بتخصك انت؟ ليي انت آخر من يعلم انو تركوك وتقعد تتذكر مواقفك مع الناس َكلامهم ليك حتنتبه انو كان بالمعنى سواء شفقة او شماته.. صعب الفراق في الحب والأصعب أن يظل طرف واحد فقط أسيراً لذلك الحب والحبيب انا في علاقتي بي يمان كنت الحلقه الأضعف كنت الزولة المعلقة في النص ومنسية . صعب أنك تختار حبيبك والأصعب من كدة أنك تحاول تكرهو وموقفك حيكون بيش لمن حتى محاولة انو انت تكرهو تكون باءت بالفشل . صعب أنك تقع في حب انسان في الوقت الغلط والزول الغلط يمان كان ليهو كم يوم ما بتصل علي ولا بسأل عني لكن انا التمست ليهو الف عذر قلت اكيد بكون مشغول بي حاجة لغاية م يوم من الصباح جاتني صبا وبقت تلمح لي بالكلام لكن انا ما ركزت معاها كتير.. ولمن رسل لي دبلتو المفترض انا الارسلا ليهو اكتشفت انو صبا كانت بتلمح لفسخ خطوبتي.. طلعت انا آخر من يعلم بموضوع فسخ الخطوبة ده صعب أن يجفاك حبيبك لأسباب غير واضحة و الأصعب من ده انو ما يبرر ليك غيابه ولا عملته كانك ما زول من حقي كان اعرف هو رفضني ليي والسبب شنو بس ما عرفت للحظةة والتو.ما جربتو احساس أنكم تقعو في حب زول ما عندو قلب .وقتها حتحس بانك بحاجة للحب لكن ما بكون عندك قدرة انك تحب لانو قلبك مات . صعب انك تفقد الحب وتخت انك خلاص تاني ما صالح للحب عموماً كونو انو خلاني احسن من يكون معاي بدافع انو شفقان علي صح ما وقف معاي في وفاة امي وابوي بس كان احسن بدل يقيف معاي وهو مغصوب علي وبالجد بغض النظر عن البت الاختارها وبغض النظر عن انها صحبتي روح بالروح وانتيمتي شديد لكن مدام هو بحبها وحتسعدو انا ما عندي اي مشكله المهم يكون سعيد بس يمان : الجوري? سرحانه وين انتي قلت ليهو معاك ما سرحانه يمان :نسينا منو ياخ!! المهم انا بحبك يا جوري وعرسنا انا والآء مفترض يكون خامس يوم في العيد فما عارف اعمل شنو هههه اتخيلو هو ما عارف يعمل شنو ويسألني انا كمان ميتة ضمير وعدم قلب بس الحمد لله والشكر لله قلت ليهو الف مبروك مقدما يلا انا وراي شغل مع الس.. يمان : جوري جوري لحظة بس اها في شنو ! يمان : انتي ما سمعتيني للآخر قلت ليهو احكي عايز شنو قال لي كلمة منك بس والعرس ده حيتلغي انا بحبك انتي وكلنا عارفين كده سكت مسافه وقلت ليهو بتحبني؟ قال لي فوق ما بتتصوري اها وآلاء؟ عاوز تجرحها زي ما جرحتني ؟ تبيعها زي ما بعتني ؟ نحن ما لعبه في يدك يا سيد يمان!صح هي خانتني ووافقت بيك بس انا يستحيل ابدل علاقتي بيها عشان ولد يمان: هي باعتك كيف انتي تكوني بالطيبه دي؟ طيبتك دي هل الغطست حجرك يا جوري اي انا طيبه وعويرة بعترف بس بحمد الله اني ما بقيت أنانية وببني سعادتي على تعاسة غيري وابدا ما حصل بعت زول والحمدلله على ذلك يمان : يا جوري انتي عارفه انو آلاء اتفرضت علي فرض!! ههههه اتفرضت عليك ! طيب ما عارف انو الفروض لازم سيدها يأديهاااا يمان : قصدك شنو انتي ! قصدي انو تلفوني حيطفي شحن يلا مع السلامه يا يمان .قفلت فيهو الخط ودموعي عشرة عشرة كرهت نفسي شديد لانو انا عارفه كويس انو دموعي دي بسبب اني يمكن اكون قسيت عليهو عاتبت نفسي ليي انا اتكلمت معاو بالاسلوب ده يعني بالجد ي جماعه انا زوله مثيرة للشفقة ليس الا.. يمان كان كل شي بالنسبة لي َولا زال كل شيء في حياتي هو جزء لا يتجزء من روحي وكن تحبوني او تكرهوني انا بعترف اني للآن بحبو والله العظيم بحبو بحبووو شديد لكن بحب كرامتي أكتر منو او هم الاتنين بنفس المقدار ويستحيل تترجح كفة الميزان. في مكان تاني ما بعيد عن بيتنا كان محمد قاعد وسرحان في كباية الشاي القدامو وملامح وشو كانها لي تسعيني اولادو رمو بيهو في دار العجزة والمسنين مرتو صفيه جات قعدت وكان ليها ساعه بترغي وتتكلم َتوصف بي يديها في محاولة فاشلة منها انها تضحكو لكن هو ولا علي بالو لغاية قالت ليهو بهرشة كده : هوي يا راجل انت جنيت ! مالك الحاصل عليك شنو مقهي زي ده محمد نطة من صوتها وقال ليها : بس عليك ياخ مالك ياخ مرة فقرية نكدية خليني في حالي والله اسي اقوم اطلقك ارتاح من نقتك الكتيرة دي يا وش النحس يا وش الفقر انا ما عارف كنت حاسي بشنو لمن اتنيلت مشيت عرستك! صفية اتهجمت من مهاجمتو ليهل وطوالي بدت تنوح وتولو وهو ما اشتغل بيها وشال كبايتو حقت الشاي ومشي الصالون.قعد في السرير وواصل سرحان في االشي الحصل ليهو.فبعد ما العربيه بتاعت الشرطه جات مسكتو ودوهو الحراسه وتم يومين تأديبه ضاق فيها الويل وسواد الليل كانو هو ارهابي مهدد امن الدولة وكان حيموت من خوفو لو ما في قلبو شوية ايمان وطبعآ ما بطلع إلا بي كفالة قدرها 50مليون واهلو وناس بيتهم كان باعو نفسهم ما بجيبو المبلغ ده حتي فكرو يبيعو البيت بس هو رفض لانو دي الحاجة الوحيدة اللهو بملكها وده مستقبل عيالو ما حيقدر يفرط فيهو وهو في الحراسه جا العسكري ونده اسمو وقت طلع معاو قالو ليهو انو حيطلع بي كفالة وكده واستغرب منو الدفعها ليهو لانو مافي زول من اهلو اصلا حيفكر يدفعها ليهو.. لكن تاني فكر يمكن اهلو جمعو من بعض ودفعوها ليهو وتاني سال العسكري هل زول من اهلو دفع ليهو الكفالة لكن في راجل تاني جاوبو : انا الدفعتها ليك .الراجل كان صوتو احرش كده وعندو دقن زي شوك الأب قنفذ وملامح وشو قاسيه كده يعني زول ما بحب الهزار كلو كلو.. محمد ما قدر يقول ليهو حاجة كانو خاف لو سألو الراجل يغير رأيو ولو تاني رجعوهو السجن واطاتو حتصبح وحيعتت هناك مافي زول حيشتغل بيهو فعشان كده سكت ساي قال يشوف نهاية الراجل ده شنو وحيطلب منو شنو لانو الزمن ده ماف زول بعمل حاجه الا بمقابل والله اعلم بعد طلعوهو الراجل ساقو معاهو ركبوا في عربية بو**ي دبل قبينة فكان محمد بعاين ف الشارع عشان يعرف هم ماشين وين ولوهلة قال في نفسو كان احسن لي السجن بدل ما انا اسي ماشي مكان م معروف وين وما معروف زاتو حيعملو لي شنو اسي كن ديل تجار أعضاء! دقستهري محمد شلاقتك غطست حجرك.. كان احسن لي اولادي اكون مسجون ولا ميت اعضاءو مشتته في جسوم الناس .. وفي اثناء ماهو بتحاجج بينو وبين نفسو العربية وقفت وقت نزلو اكتشف انو الراجل وداهو محل كده مقطوع مافيهو بني آدم هنا محمد اتشهود بينو وبين نفسو وقال برجفة : ف ف ف في شششششنو !!؟ و و وليي ن نحن جينا هنا ! عايزين مني سنو انتو انا انا زول عندو عيلة عندي شفع صغار منتظرين ابوهم لو حصلت لي حاجة عيالي حيتشتتو رجعني السجن وشيل قروشك لو سمحت الراجل ما جاوبو وبدل من ده ابتسم ابتسامة مكر ودهاء ومحمد خلاص عرف نفسو هالك لا محالة.. حاول انو يجري بس الراجل مسكو بيد واحدة وقال ليهو انا لو مكانك ما بفكر اعمل كده عشان كده لو عايز تعيش وتشوف اولادك تاني اقعد عاقل احسن ليك. وفعلاً محمد قعد عاقل وبعد شويه جات عربيه كده وقفت ونزل منها واحد وكان غضبان غضب الجن قال ليهو : انت محمد !؟ محمد كان سسسساح خلاص من الخوف وما عرف يرد بي لا ولا نعم لأنو لو قال لا الراجل ما حيصدقو وزاتو باين انهم بعرفوهو عشان كده طلعوهو من السجن ولو قال نعم ما معروف نتيجة نعم دي شنو عشان كده إختار انو يسكت وما عارف انو السكوت علامة الرضا مسكين والله ! الراجل عاين ليهو مسسسافه بعدها طلع مسدس وعمرو.وقال : ما دام ما عاوز تتكلم انا زاتي ما حأتكلم وبالتالي حنخلي حضرة سيادتو يتكلم ويختصر لينا الموضوع لانو انا ََ مشغول وما فاضي ليك والله بعدها ورفع ليهو المسدس محمد نططت عيونو وقال ليهو بسرعة : انا محمد!! ااااي انا محمد والله ابوي سماني محمد عليك الله ما تضربني عندي أطفال صغار انا وقعد يبكي باعلي صوت ليهو الراجل ضحك وقال ليهو كده بقينا حلوين ومشي ليهو بي ورا وخت المسدس في راسو من ورا وقرب علي اضانو وهمس ليهو : طيب يا محمد بتعرف جوري؟ وانتو بتعرفو البنزين؟ طيييب اقيفو ? محمد قلع عيونو وبدا يتم تم ج جرجوري منو م بعرف اي جوري انا الراجل قال ليهو: لالا بتعرفها كدي قول خير واشر على المسدس.. محمد قفل عيونو وقال اي اي بعرفها جوري اخت خالد بت جيرانه قال ليهو انت مش متزوج؟ محمد : وعندي أطفال وبحب مرتي وعيالي شديد وعايز ارجع ليهم قال ليهو حلو.. كلنا عايزين نرجع لزوجاتنا وعيالنا.. لكن البرجع البمسك ادبو ويدو عليهو فاهم؟ محمد فاهم فاهم والله فهمتك وانا اسف بعتذر والله قال ليهو شفت جوري تاني لو ساي عاينت ليها نظره ما ياها المسدس ده بفضي طلقو في راسك ! يلا غور من قدامي ! رجعو لي الواقع صوت صفيه : يا راجل انت جنيت ادوك شنو في السجن من متين انت بتنبذني كده؟ نسيت وقت جيت ركعت قدامي عشان ارضى بيك محمد اتخلع وقت شاف صفيه وقرب يصرخ. صفيه : لالالا الا يودوك لي شيخ شكلك جنيت محمد : انتي بس اطلعي خليني في حالي ياخ ! وإلا قسمآ اهج بره البلد واخليكم انتي واولادك صفيه قشقشت دميعاتها وهزت راسها وطلعت خلتو ** الله اكبر الله اكبر الله اكبر لا إله إلا الله الله اكبر الله اكبر ولله الحمد تكبيرات يوم العيد بالجد مافي زيها ولا العجب الصلاه والخطبه سبحان الله ! تسمو بروحك وبتحس بروحانية عجيبة العيد فرحة للصغار وراحة وطمأنينة للكبار لكن اول يوم في العيد بجي عدم الموضوع ا داك ما حبابو كلو كلو صبا مشت لي أهلها معاها العيال وانا خفت شديد تنفذ مخططها السمعتو داك وكان لازم افكر بحاجة واتصرف قبل الفاس تقع في الراس خالد قضي اليوم نوم بس لانو ساهر في السوق يحليلو تعبان وشقيان علينا ربنا يهون عليهو اما انا عدم الموضوع قتلني عشان كده بعد خلصت طبيخ فتحت الشبكه وماف الا رساله واحده وشوية إشعارات لقيت الرساله من أمير مدريد افتكرني يحليلو هو الوحيد الرسل للمسفوهة دي مرسل رسالة عيد عاديه رديت ليهو وانت طيب وعساك من عواده بعد 34ثانيه رد لي : كيف مع الملل ! وكان دايما بين رسالتو 34ث بس بحب الناس البترد سريع ويا جماعه الرد السريع عمرو ما كان خفة ختو الكلام ده حلق في اضانكم والله اعلم ضحكت طوالي وآخيرآ لقيت لي زول يشعر بالملل قلت ليهو : أحلي شي في اليوم ده صلاة العيد وشراب المويه بس تاني ماف جديد يذكر ولا قديم يعاد قال لي : اي والله اها ان شاء الله مشيتو تعيدو بس. قلت ليهو في البيت رد لي : لكن اكيد حتطلعي المساء مع سيد ريدك صح ولا انا ما غلطان قلت ليهو ما صح وما غلطان ضحك وقال لي كيف دي فسريها لي يا صيدلانيتي قلت ليهو صيدلانتك عديل دي مشاغله ولا شنو قال لي احكي لي م عارفه لكن حبيت افضفض ليهو وبدينا نحكي عن مشاكلنا حكيت ليهو عن يمان وعن الشئ العملو فيني وعرفت منو انوهو يتيم ام وأب .وكان عندو أخو اكبر منو وبسبب الظروف انفصلو وحاليآ ما عارف عنو اي حاجه يعني شوية حسينا بالراحه لما فضفضنا لبعض بالرغم من اني ما سمعت صوتو ولا هو سمع صوتي بس قدرنا نوصل احاسيسنا اسفيرياً بعدها شالتني نومة ما صحيت إلا بصوت تلفوني عاينت لقيتو شاهين رديت عليهو وانتبهت لصوت زينة الكانت بتبكي وعاملة جوطة شديدة قال ليها هاكي ماما جوري عايزه تتكلم معاك قلت ليها زينو نور عيوني مالك بتبكي يا قلبي بابا زعلك ولا سنو كانت بتهمهم لي ما عرفتها عاوزه شنو المهم فضلت اتكلم معاها لغاية هدآت واتجاوبت معاي حتي لمن ضحكت ادتني ابوها شاهين : ما عارف لولاك كان انا حأعمل شنو ! البت غلبتني ياخ انتو البنات مالكم صعبات كده بتصعبوها علينا كتير ياخ ضحكت وقلت ليهو كل عام وانت بخير قال لي كل عام وانتي معانا خجلني وفاجأني ما عارفه هو بلمح لشنو وماعرفت اقول ليهو شنو عشان كده فضلت ساكته. السكوت ده مريح شديد وبكون اجابه مختصره لاي سؤال صعب بلاقيك تسكت بس قال لي جوري قلت ليهو نعم قال لي : عاوزك في موضوع ضروري لو بتقدري ممكن نتقابل الليله؟ قلت ليهو ما عارفه والله خالد اخوي في البيت وما بقدر اكذب عليهو اقول ماشة لصحبتي وما بقدر اكلمو الحقيقه اقول ليهو ماشه اقابل زول والله يموتني في ارضى قال لي ارجوك حاولي عشان خاطر زينة والله مشتاقة ليك شديد ما ت**ري بخاطرنا ارجوك وقت شفتو بترجاني كده خجلته والله وما قدرت ارفض عشان كده قلت ليهو طيب المساء حأمشي لي منى اعيد عليها بسرق من وقتي خمسه دقايق لاغير تمام قال لي ربنا يخليك تسلمي لي يا رب طبعاً بقول حاجات كده تحير زاتو وما تعرف ترد ليهو بشنو زاتو قفلت منو و قمت عشان أصلي الضهر لقيت خالد بكابس في المطبخ قال عاوز يعمل قهوة لأنو مصدع قلت ليهو يرجع انا بعملا.. واشتهيت لي خلية نحل قمت عجنت عجنتها ومسافة اقلي البن العجين قام فكورتها ودخلتها الفرن وخلصت القهوة شربتها مع خالد وكلمتو اني ماشه لي مني قال لي امشي طوالي لكن ما اتأخر واداني قروش مواصلات وعرفت منو انا صبا حتبيت مع أهلها وكده اتاكدت انها ناويه على حاجة خليها اتصبر لي بس جهزت وركبت لي ركشه مشيت لي مني الساعه كان 4:34م اتونست معاهم كدااا امها ظريفه ضحكتني ضحك ! زكرتني بي امي ربنا يرحمها قدر ما حاولت اطلع ما خلوني الا وقت اتغدينا بعدها طلعت قريب للمغرب كده مني قدمتني وطبعآ منى عارفه بحنك شاهين وقفت معاي لغاية جانا سلمت عليهو وعلي زينة ورجعت بيتهم قال لي : تحبي نمشو وين؟ قلت ليهو زمني ضيق والله ..اتكلم هنا عشان ارجع البيت بدري لانو خالد منبه علي ما اتأخر قال لي خلاص خلينا نلف القضارف حبه نشوف فيها شنو بعدين زينة وابوها مشتاقين ليك كتير عملت رايحه طوالي وغيرت الموضوع قلت ليهو : تنوير كيف؟؟! ضحك طوالي وقال لي : تنوير !؟تنوير كويسه والله بتسلم عليك .

Free reading for new users

Scan code to download app

App Store Google Play

Facebookexpand_more