صف البنزين

الفصل الثالث

لقيتو دا يمان مسك سيد البقاله من قميصو وجراهو لي برة و وقع فيهو خبت ودق وكان بكورك بأعلى صوتو ولوهلة حسيت انو حيموت في يدو

انا في الحالة دي م عرفته اعمل شنو وما بقدر اتدخل في نصهم ولا اجري انادي خالد اخوي وما كان في الشارع غير النسوان تاني فيهو زول فقعدت انا زاتي اكورك واترجى في يمان انو يخليهو لكن لاحياة لمن تنادي كأنو لمن يسمع صوتي بزيد في قوة الدق

قلت ليهو وانا ببكي : حلفتك يا يمان تخليهو في حالو انت زول عاقل ما تتهور وترتكب حماقة تندم عليها طول عمرك حلفتك يا يمان خليهو الدنيا رمضان يا يمان كده ما صاحزوزاتو صيامك ده ما حيمش بالطريقة دي

لكن ولا كأني بتكلم..البت تكنس والشجر يحت علي قول فله..

ما لقيت خيار الا وقت صرخت طوالي باعلي صوت عندي : يماااان! طوالي وقف

طبعآ زي ما لاحظتو نقطة ضعفو صرختي دي يمكن احلى حاجة في الدنيا دي ونفعتني في النهاية وقت يسمع صرختي طوالي ببطل اي حاجه كان بعملا مهما كانت مهمة ليهو مفهمني اني لما احتاج ليهو بخلي اي حاجة في يدو ما عارفه السر في كده شنو بس انا مستفيده من الحاجة دي جداً ودايما بتفيدني في اكتر المواقف صعوبة زي الموقف ده بالظبط يمان فك محمد وهو في حالة يرثي لهل وجراني من يدي ومشينا على البيت كنت بقول ليهو انت جنيت؟؟. ده سيد الدكان يا يمان ومتزوج بمرتو واولادو يعني حياثر فيني بشنو ولا انا خأعاين لزول متزوج فكرك؟. رد لي ي يمان انا بتكلم معاك! الوو يمان! وداني للبيت وم فتح خشمو ولا بكلمه.وبعدها مشي ! بهذه البساطة.. ماحصل مرة لاقاني زول عنيد زيو اطلاقاً

دخلت البيت وانا بررجف وعيوني ملانه دموع لااقاني جود قام حمر لي لزوم جايه بعد شنو وكده لانو اتاخرته عليهم كتير لكن وقت شاف البسكويت خطفو.مني وجرا ..

دخلته غرفتي وانا بررجف وقفلت الباب قعدته ف السرير ومسكت راسي بي يديني وانا بسال نفسي سوال يمكن انا عارفة جوابو كويس و يمان عارف جوابو ويمكن انتو كمان تكونو عارفين جوابو هل ده صح؟ ياربي يمان لسع بحبني ؟لكن 3سنه م شفنا بعض ولا اتكلمنا مع بعض تفتكرو لسع بحبني ! يارب لطفك يا الله ما عايزة اتخته في موقف زي ده يارب

#flash_back

قبل 3سنه في بيتنا الهادئ الجميل كنت قاعده بتسرح قدام التسريحه في غرفتي وبدندن ساي في الاغاني سمعت زول بدق الباب كانت دي صبا مرة اخوي دقت لي الباب ودخلت عيونها كانو مورمات من البكا عاينته ليها بأستغراب قامت وقلت في نفسي الدراما كوين اسي تتلقى السبب شوكلاته ما جابها ليها زوجها المصون ما اشتغلت بيها كتير واستغربت جداً لكن ختت يدينهل حواليني وكانت بتبكي وقبل ما اسألها قالت لي : : جوري..ماما وبابا اتوفو يا جوري ..وقعدت تبكي! هكذا القت لي الخبر وانا م عرفت اقول شنو ولا اعمل شنو قالت لي جوري.. ربنا يرحمهم ويغفر لهم ويسكنهم فسيح جناته هنا انا جدعته الفرشه من يدي وقلت ليها : شنو! دا م وقت هظار هووي يا صبااا

قالت لي وهي بتبكي هم كانو في الحرم وقت الرافعه وقعت وقالو لينا انهم مع الضحايا يا جوري ماما وبابا خلاص راحو وقعدت تبكي تاني وانا ما فهمت شي والله يا جماعه حتى نسيت انو امي وابوي مشو الحج السنه دي واستغربت الوداهم هناك شنو لمن رافعه تقع فيهم!

صبا:جوري انتي كويسة؟؟

طبعآ م حسيت بي روحي الا وانا واقعه جمب التسريحه وكلام صبا وصريخها بقى لي بعييد كأنو هي ما جمبي ولا ماسكاني حسيت باطرافي باردة شديد ونفسي باخدو الله الله

تاني م حسيت بي حاجة بس فراغ وضلام وتوهان في مكان ما عارفة هو وين اصلا وكنت براي وخايفه شديد .

بعد 34دقيقه كده فوقته..لقيت نفسي في سريري في الغرفه براي وبرة في اصوات بكاء وعويل قلبي دقة بسرعه ليي انا م حلمانه يعني؟؟ دايماً بتجيني كوابيس ووقت اصحي القاها حلم بفرح شديد لكن لييي انا اسي م بحلم ي جماعه لييي ..غمضته عيوني قوووي عسي ولعل اصحى من الكابوس دا !" بس للأسف.كل شي كان حقيقي !

قعدته اصرخ بأعلي حس عندي !أوومي ! اووومي لااا اوومييي !ابوي وين انتو امي تعالي لي! ابووي وين انت وين انتو تعالو لي!

جات داخله آلاء بت خالتو لي يمان وفي نفس الوقت و صحبتي شدييد وانتميتي

حضنتني عليها قووي وقالت لي اتيقني ي جوري كلنا حنمشي وامك وابوك ما غاليين علي ربهم !

ومع قوله الكلام كانو انا بس وثقت في كلامها هي وي داب صدقت انو امي وابوي فعلا ماتو وما بقو عايشين في الدنيا دي عرفت اني اتيتمته خلاص وما عندي ام ولا اب تاني صرخته صرخه واحده وم حسيت بي روحي تاني الا في المستشفي ..

تلفوني ضرب ورجعني من الflash_back#

لقيتها دي منى صحبتي..

مسحت دموعي وحاولت ابين اني م قاعده ابكي لكن وقت قلت ليها : الوو صوتي كان خشن فواصلته :صحبتك مخطوفه معانا من اول امس ولو م جبتو القروش حننفذ المهمه وما حتشوفوها تاني الا في القبر

مني : هييييع مهمة شنو وقبر شنو ي مجرم يا عولاق قبر اليضيق بيك وما تلقى فيهو ذرة الهواء !

قلت ليها : آآ اممممم آاا المهمه اي المهمه

مني : ااااي المهمه قولا لي ي استاذ يا فاهم يا خاطف يا عولاق

قلت ليها : تاني كن قلتي لي عولاق بنفذ المهم اللهي حنحرقها اي اي حنقرها بي البنزين كمان..

مني : هههههه يحرق شعرك ي غباء هورالبلد فيها بنزين لمن تحرقو بيهو الناس

قلت ليها : هوووي! انتي زاتك حنجيبك معاها نحرقهم سوا اصلا في بنزين كتير

منى دي الضحك شرطها قلت ليها رمضان كرييييييم

مني : الله آكرم..وتصومي وتفطري ع خيييير يا جاسيه.

قلت ليها : جاسيه علي ركبتي ام يداي !؟

قالت لي جاسيه علي رقبتك كالأبل تمامآ يا مسيخه ياعولاق الزهور

قلت ليها ع اساس الأبل بجثو علي رقبتو يعني ! بعدين عولاق الزهور ده شنو

وقعدنا نضحك ساي وحكيت ليها بالحصل معاي كلووو من وقت نزلت خلتني لي لحظة اتصالها بي . شمارات تقيلة بعيد عنكم

سكتتت مسسسافه وقالت : يمان دا انسان غريب جداً واكتشفت انو زول همجي ومتخلف ورجعي وأهبل كمان.

قلت ليها هووي ما برضي فيهو والله. مهما كان كان خطيبشي

قالت لي ي بت مش انتي و هو بتكرهو بعض!

قلت ليها صاح انا بكرههو بس م كتير يعني حاجة كده خفيفه

قالت لي بغض النظر عن هبالتك الانا عندي معاها تصرف تاني انور شاهين دا شكلو علق فيك وكده وبتاع ههعععع م شوفتيهو لمن جابنا كان بعاين ليك كيف؟ الشوقر دادي كما يجب أن يكون

قلت ليها والله ي مني ماف شي بحيرني الا لمن يطلب مني حاجه انا بنفذها بدون م اشعر كانو بنومني مغنطيسياً ولا شنو الفهم ما عارفة

مني : هههههه مطييييعه وعسل..سكتت مسسسافه وقالت : يا جوووري

قلت ليها عيون جوري وانف جوري وكرعين جوري

قالت لي بغض النظر عن أنف و كرعين دي الحيكون عندي معاها تصرف تاني هي كمان و

انور لو اتقدم ليك فهمك حيكون شنو؟؟ة

قلت ليها: بدون التفت حأرفض طبعآ قلت ليك غير يمان ما عايزه زول وبما انو ما حيكون لي فبلتالي احسن اقعد عانس كده لغاية يشتعل الراس شيباا.

قالت لي متأكده انتي ياجوري؟

قلت ليها اااااي متأكده. نتراهن يا بتي ولا كيف ثقه ماف كلو كلو

قالت لي سمممح. نتراهن ليي مش انتي عارفه نفسك عايزه شنو و واصلت م كلمتك حسام خطيبي جاب لي شنو

قلت ليها شنووو كلميني !

قالت لي وحيد قرن علي شكل جوري هععععع

قلت ليها يوحد مقامك يارب

قعدت تضحك ساي وتكلمنا نص ساعه تاني في كلام لو غربلو حتلقو فيهو كلمة واحدة نافعه من شاكلة الصيام

بعد قفلته منها مشيت ختيت البليله وجيت نشطت نت اصلآ كان ماف موضوع

دخلت الفيس م لقيت ولا صديق متصل اتمغصته مغصة السواد والرماد عشان كده قلت أشوف المنشورات.

لقيت واحد داخل بي أمير مدريد منزل منشور في سودانيز آفرو وكان صورة بات مان وهو بضرب في واحد وكاتبين جمب البضربو : هي يا ببا ي علب المربى

وجايبين جمب باتمان تعليق : الببو اليشق حنكك

طبعآ م فهمته شي

والزول كاتب جيبو لي زول م غني الغنية دي وانا حأمشي أسبانيا كداري .

علقت ليهو انا ما حضرتوعشان كده جهز شنطتك بس وسلم لي علي ميسي وقول ليهو مسيوهات كتارات

بعدها اتنقلته في القروبات كمممم مرة ومشيت قريت لي رواية من قروب حكاوينا السودانيه الحوب..

لمن حسيت بالعطش قلت انوم شوية واقوم اشوف البليله.

صحيت بعد ساعه و34دقيقه لقيت البليله اتفحمت..وصبافي التلفزيون ولا كلفت نفسها تقوم تطفيها غايتو بس!من الغ*ينه جدعته الحله تحت التربيزه وطفيت الغاز ومشيت واصلته نومي.

4وقت جات قمته طبخته والله الله لا أداكم مرة اخو زي صبا دي .

ربنا يصبرني بس

عملته العصيده قطعت قلبي والله هيي صحي انا بعرف اعمل عصيدة والله

مشيت رقدته شويه كده تلفوني دقه لقيتو رقم شاهين

قال لي م أكون صحيتك من النوم مس جوري؟؟

قلت ليهو لالا .أصلآ كنت صاحيه.

قال لي صوتك م عاجبني ما تكوني عيانه بس؟؟

قلت ليهو عملت العصيده تعبتني شوية.

قال لي بإستغراب : انتي بتعرفي تعملي عصيده !

قلت ليهو اااي ...ومستغرب ليي هي عصيدة ي جماعه

قال لي لالالا م مستغرب ولا حاجه وواصل:

طيب ومرة اخوك شغاله شنو

قلت ليهو اطفالها لسع صغار. ما حبيت أوضح ليهو انا عايشة دور الساندريلا مع مرة الاخو

قال لي خلاص ارتاحي شويه وبعدين حأتصل عليك زينة عاوزه تسمع صوتك ممكن؟

قلت ليهو حاضر عيوني لزينة

تسلم عيونك يا رب

وقفلنا علي كده (طبعآ كأني م**رة ..م قدرت ارفض نهائي )

وانا راقده قمته فجآة ياربي انا كلمتو بي أسرتي ؟؟

تاني قلت احتمال كلمتو يوم وصلني البيت داك.

أتذكرتة حلة الملاح قمته سريع سريع حصلتها عشان ما تلحق البليله

**

بعد الأفطار فتحت الفيس اول شي انا متعوده بفتح الاشعارات .لقيت أشعار من أمير مدريد داك أنو قام بالرد علي تعليقك ...فتحتو لقيتو كاتب : بس انا ريالابي .

م اشتغلته بالتعليق وشوفته باقي الاشعارات لقيت أمير مدريد يريد التواصل معك اجي يخواني

طبعآ عادي ممكن تفتح الرساله وم يعرفك فتحتها ولقيتو مرسل لي فيديو وقت فتحتو لقيتها الغنية حقت هي ي ببا ي علب المربي

طبعآ مسلسل xxلارج (طبعآ مسلسل فظيييييع ...ما بتعجبني الا ألماظة هههههههع ) اتاري انا عايشة بره السودان وما عارفه

قبل ما أرد سمعته جمانه بتبكي تحت قمته نزلت سررعه عشان اشوف الحاصل نزلته ولقيت

يلا الحاصل شنو !ولقيت شنو دا حنعرفو..

بس حلفتكم ما تتخطو الصف حق البنزين وكونو سواقين مؤدبين ? يلا يلا أقيفو في الصف ..

لقيناهو يمان الأيامات دي مرابط جمب بيتنا ما عارفه فهمو شنو.

.لكن لو اصلآ هو عايزني م كان جاب شيلتو وحدد عرسو

صبا قالت ليهو بأستغراب : يمان ؟خير الجابك حينا شنو الليله رايح ولا جابك الحنين !؟

ارتبك طوالي ما عارفه مالو قال : ا ا ك كنت ماري من هنا ..وطوالي قال بسرعه : ارح اوصلكم شكلكم طالعين..

صبا قالت ليهو وكأنها نست انو لازم يجاوبها ع سؤالها : وكمان مبروك قالو اليوم شيلتكم ! طوالي ابتسم وشكلو ارتاح لأنو صبا م ركزت هو جا هنا ليشنو قال ليها :

الله يبارك فيك اي الليله والله.

هنا انا زاتي قلت ليهو وفي وشي بسمه مطلعاها غصصصب : الف مبروك وربنا يتم ليكم ع خير يا

ابتسم وقال لي آمييين..وعقبالك كده نفرح بيك

هنا صبا عاينت بشماته قطعت قلبي والله حسبي الله ونعم الوكيل فيها

يمان زاتو لاحظ وقال عشان يزيل التوتر صبا ارح اوصلكم العربيه هناك...طوالي مشت ع العربيه ولا فكرت تستشيرني زاتو غ*يه خلاص!

وعلي العليها ركبت ورا كمان

كنت عاوزه اركب معاها بس قالت لي كده م صاح اركبي معاو.

مسكت جود من يدو قالت ليهو : ماما تعال معاي ورا عشان م تضايق عمتك.

جود مشي ركب معاها وهو بتأفف وانا أضطريت ركبت قدام معاهو

كنا ساكتين طول الطريق لغاية فتح خشمو وقال : يدك بقت كيف؟؟؟

قلت ليهو والقال ليك يدي معوقه اصلآ منو يا استاذ

وله عشان الخدشه د*ك؟

قال اي

قلت ليهو في جروح اكبرر من دي م سألته منها عاوز تسأل من الخدشه دي؟؟؟

سكت ساي وباين عليهو انو غضب..وقام زاد السرعه

صبا الشمار حرقها وما قدرت تسال لانو عارفه كن سالت يمان حينزلها ف نص الشارع وهي مجربة قبل كده ...وصلنا بيت ناس الآء وبس مع نزلتنا دور العربيه واتخارج سريع سريع قلت في نفسي وقت انت ما قدر الكلام بتتشالق مالك لكن تاني قلت اكيد م عايز زول يشوفو ويجيب ليهو كلام..

المهم ما علينا دخلنا وكلهم اتفاجؤ بي جداً ونطرو عيونهم وكانو بعاينو لي اتكيفت خلاص من نفسي.. ما انا البن**ر ياخ ولا شنو يا جماعه

سلمت عليهم وهظرت مع البهظرو معاهم ولا كأنو في حاجه حاصله

ام الآء خالتي خديجه جات تتكبكب والخجل كاتله قمت حضنتها ولغاية قلت ليها امي كيفك وكيف صحتك بردتو ليها طبعاً

المرا تقول الواطه تنشق وتبلعها.

بعد قعدنا شويه قلت لي واحده من البنات الآء وين قالت لي ورح اود*كي ليها

مشينا ولقيت قاعدين معاها بنات الحي كلهن

من وقت شافني كلهن اتخلعن قلت في نفسي انا بعاتية ولا شنو يا جماع جيت سلمت عليها بالأحضان وسألتها من حالها .ولا كأنو في حاجة بيناتنا

والله ي جماعه ربنا دا كريم سبحان الله م عارفه القوة دي جاتني من وين وفعلاً ما كان فارق معاي يمكن لاني قطعت العشم زمان من يمان والله اعلم

قلت ليها اها..وحتتمي الجامعه بعد العرس صاح ؟

قالت لي وصوتها كله برجف : ااا اي ب ب بتمها..

قلت ليها اي احسن تتميها الرجال م عندهم ضمان لكن شهادتك ممكن تضمنيها

الناس كلها سكتت كانو كهربا وقطعت غيرت ليهم الموضوع طوالي واتونسسنا لغاية صبا جات داخله وجمانه كان كديستها قامت..اظن نعست .

صبا بعد باركت لي الآء قالت لي نمشو بعد دا.

ياهو ودعناهم وطلعنا خليناهم الخجل كاتلهم ..

مع دخلتي غرفتي انجدعته ف سريري وطوالي قعدته ابكي..بكيت وبكيت زي اليوم الامي وابوي ماتو فيهو كنت كاتمة جواي كتييير ولو م طلعته بموت قبل تصبح علي

وانا ببكي جاني اتصال من شاهين م عارفه بس فرحته وحسيت بالآمان فتحت الخط وبس قعدته ابكيي ليهو

احلي شي انو سكت كنت سامعه صوت انفاسو وكأنو كان بشاركني حزني م عارفه لكن حسيت نفسي ببكي في حضنو.

بعد هديت حبه قال لي بتقدري تنزلي تحت ؟؟

قلت ليهو شنو !

قال لي انا تحت جمب بيتكم بتقدري تنزلي

قلت ليهو م اظن قال لي عارفها صعبه بس م اظن اخوك حيجي اسي انزلي

لبسته طرحه وطلعته بالراحه لقيت صبا في غرفتهم اظن نومت جمان ونامت.

و جود ف التلفزيون وشكلو مستكين ومرخم ..وياهو خالد بجي لي 2:34ص بعد مرات

مشيت فتحت الباب وشوفته السنتافي الحمرا الماخده عقلي واقفه بعيد.والحمد لله شارعنا فاضي وبقالة محمد من دون الأيام مقفوله

مشيت ومن شافني نزل..كان لابس بنطلون جينز اسود وكارينا رجاليه بيجيه وبدله سوداء.وجزمة سفينة سودااء..قممممة الأناقه..+ طبعآ انا بفستاني م لحقته أطلعووو

وقت شافني م قدر يدس نظرة الاعجاب العاين لي بيها وانا م قدرتة ادس الخجل الحسيت بيهوو..

سلم علي وقال لي امسحي دموعك سرررعه واركبي دقايق..

مسحتها وركبت العربيه..طوالي زينة نطت لي ..فرحته كتيير بشوفتها قلت ليها زينة!وحضنتها بالراااحه لانو لسه م اتعافت

آشرت لي بي يديها السليمه وفي وشها ابتسامه..

ابوها قبل يفتح خشمو قلت ليهو : قالت هي مشتاقه لي ورديت ليها : كتبيييير حبيبتي انتي .

طبعآ لاحظتو مستغرب ومبسوط قلت ليو مروة بت خالتي الصغيرة بكماء برضو وطوالي بفهمها وبرد ليها عشان كده

ابتسم وقال : تحبو نمشو جولة ؟

قلت ليهو م بقدر والله الزمن وبعدين يمكن صبا تصحي وم تلقاني تقوم تعمل لي مشاكل ساي انا في غنى عنها

قال لي ختي حاجة واحدة في بالك انك وانتي معاي م بتجيك حاجه ودور العربيه اتحرك وكالعاده م قدرتة اتكلم ولا امنعو ولا احتج ما عارفة عامل لي شنو الزول ده

يلا دا كلووو حصصصل وفي زول شافني..يعني طبيعي جدآ زول يشوفني ..يلا دا منو ؟

حتعرفو قدام..

لفه بينا القضارف كلها وشلنا لينا آيسكريم و فطائر شاورما من روابي وكنا مبسوطين شديد لوهلة حسيت باحساس الأسرة وكنت فرحانه شديد والله كانو اليوم ده م يخلص

يلا وقف العربيه جمب الظلط حق الشعبي وقال لي شيلي الحاجات ورح نص الظلط..قلت ليهو انت جادي ؟

م رده وشال زينة ومشي.

انا جبت باقي الحاجات ..و

قعدنا في الفاصل قام جاب لي زينة من العربيه كرسي متحرك عشان رجلها المضروبه ..

قعدنا في الفاصل واتونسسسنا كدااأ .الناس يآشرو علينا ساااي والبجو مارين بعرباتهم برضو كان منظرنا حلو خالص ومع الأضواء حقت الظلط و مع الجو الرمضاني العجيب دا كان يوم لا ينسي ودا كان25رمضان

رجعته البيت والحمد لله خالد ما جا وصبا نايمه وبتشخر كالبعيرفي المزرعه ما هاميها شي ووجمان وجود بشخرو كالملاك على الأرض

دخلته غرفتي وانا بغني اغنية حالة حب لإليسا : عايشة حالة حب معاك وخداني

قطع الغنية صوت تلفوني لقيتو شاهين قال لي اها في زول شافك !

قلت ليهو لالا ..

قال لي نحن زاتنا اسي وصلنا سكت مسسافه وقال : بالجد شكرآ ليك وقفتك معاي دي م حانساها ما حييت

قلت ليهو شكرآ ليك انت لأنك طلعتني من الحاله الأنا فيها

قال لي جبيل شفتك مبسوطه مع زينة وم حبيت اسألك مالك كنتي بتبكي في التلفون احكي لي في شنو ؟؟؟

فكرتة بيني وبين نفسي(وم قلتلوش عل لفنسي ههههه) ي ربي بكون عارف انو يمان حيتزوج وانو كان خاطبني بالزمنات تاني قلت م اظن..

قال لي الوو..

قلت ليهو معليش شردته شوية كل الحكاية انو خطيبي السابق حيتزوج صحبتي واليوم كانت الشبكه بتاعتهم وانت وقت اتصلته علي كان ي داب دي دخلتي البيت.مشيت باركته ليها وكده.

سكتت مسسافه وقال لي : م تشيلي هم مس جوري..كلو لي خير ...يلا انا حأمشي اشوف زينة شربت اللبن ولا لا

قلت ليهو.سلم لي عليها كتيير عليك الله

قال لي وصل.. يلا تصبحي على خير وقفلنا علي كده..

وانا قاعده سرحانه في الحصل في يومي سمعت كركبه طلعت لقيتو خالد قال لي بعد عاين للفستان الأنا لابساهو: طلعتو وله شنو !؟

قلت ليهو اااي مشينا الشيله حقت الآء خطيبة يمان صبا م كلمتك

خالد ضرب يدو في راسو وقال نسيت والله

عاين لي كانو عايز يستفسر هل انا كويسة وحسه انو انا حأكون مضايقه وكده..وعشان يخفف حرج الموقف قال لي خلاص ي اختي الحلوة..انا جبته سمك جاهز انتي جهزي لينا السلطه وتكوني م قصرتي

قلت ليهو جبته سمك بس ؟

قال لي معقققققوله انسي اختي؟ جبته سمك وآقاشي

طوالي بوستو في خدو وشلته الكيس جريت المطبخ قطعته السلطه وعملته التحلية سلطة فواكهه وكبيت فيها عصير كركدي بقت ظابببببببته بشكل

بعد اتعشينا غسلته العده واخدت حمام وياهو نوممممممته..م صحيت تاني الا الصباح .

نزلت تحت مشيت المطبخ م لقيت صبا وجود وجمان كانو بحضرو حلقات مسجله من غامبول

طلعته برة شوفت صبا بتتاوق بي باب الشارع وفي جوطة برة

آشرت ليها في شنو !

عملت لي أشارة هسسسس..

جيت تاوقته معاها وشفت العجب

احممممم اقيفو ف الصف ?

! الوقت ذاته..: لمن القلوب بالشوق تدق وقتها الناس العزاز بتشابهو جداً و لمن النفوس تفضل تشع الرهبة والامل وقتها الملاذ يتلاشى و مقياس المسافة يتلاشى وبتسقط اوراق الحراز.

انا ياما حاولت اغش نفسي واهجر حبي ليك يا يمان حاولت امسك نفسي ما امشي واجيك حاولت ما افقد هيبتي وغروري واتنازل ورحلت عنك وعن ديارك وهدمت كل امالي فيك وقطعت فيك كل العشم لكن برضو ما قدرت اسيبك انت عارف يا يمان انا لما انساك بشتهيك؟

اتخيل الزول يشتهيك ويخاف ويهرب من لقاك؟؟ في عذاب اكتر من كده؟ الزول وقت يخاف عليك من شوقو ليك ما شوقو اكبر من هواك وحتى ريدو ليك ما بتوصف و روحو دائما مشتهاك لانو اصلا في حقيقه واحدة انو قلبو غيرك ماعرف وما حب غيرك ابداً وما مستعد يعرف ويحب زول غيرك.

مراسيلك بترد الروح وتجبر خاطر المجروح بتمنى ما ماانجرح منك ولامني انت تكون مجروح

بتمني السحابه تزروك وتقول ليك الرسائل ما بتكفي حتى لو كانت قصائد والهواتف ما بتطمن حتي لو طال الكلام البكفينا العيون تحضن عيونك عسى ولعل الشوق يزيد ونرتاح