Chapter 54
“Alam mo, Kasimiro? Hindi ka naman sana madadamay at mawawala sa amin ng limang taon kung hindi ka na lang bumalik para tulungan ako. Napansin ko noong gabi na kinuha tayo ng mga wizard na ‘yon, hindi ka nila hinabol kahit alam nila na pupunta ka sa kaharian upang humingi ng tulong.”
Ngumiti si Kasimiro sa kaniya habang nakatingin ito sa langit. Napansin na niya iyon, limang taon na ang nakalipas, nang dukutin sila ng mga wizard. Hindi hinabol ng mga ito si Kasimiro kahit na alam ng mga ito na hihingi ito ng tulong. Doon pa lang, alam na ni Evan na may kakaiba.
Ngayon naiintindihan na niya, hindi nais ni Philiph na madamay si Kasimiro sa nais nitong gawin sa kaniya. At maaaring ang mga sinabi nito nang gabi bago siya nito pagtangkaan na patayin ay para lamang galitin siya.
